რუმინეთის დედაქალაქ ბუქარესტში შავი ზღვის ეკონომიკური თანამშრომლობის ორგანიზაციის (BSEC) წევრი ქვეყნების საგარეო საქმეთა მინისტრთა საბჭოს (CMFA) შეხვედრა გაიმართა.
საქართველოს საგარეო საქმეთა სამინისტროს ინფორმაციით, მხარეებმა განიხილეს ორგანიზაციის ეფექტურობის გაზრდის საკითხი, ასევე BSEC-EU-ს თანამშრომლობა, სხვადასხვა სფეროებში თანამშრომლობის განვითარების პერსპექტივები, რეგიონალური პროექტების განხორციელება და სხვა.
შეხვედრაზე საქართველოს დელეგაციის ხელმძღვანელი, საგარეო საქმეთა მინისტრის პირველი მოადგილე ნიკოლოზ ვაშაკიძე სიტყვითაც გამოვიდა. გამოსვლის ვაშაკიძემ აღნიშნა, რომ საქართველო, როგორც BSEC-ის ერთ-ერთი დამფუძნებელი სახელმწიფო, მხარს უჭერს ორგანიზაციის ქმედუნარიანობის ამაღლებასა და მის რეფორმირებას. ვაშაკიძემ ასევე ხაზი გაუსვა შავი ზღვის რეგიონში ეკონომიკური თანამშრომლობის გაღრმავების აუცილებლობას და ამ მიზნით, ქართული მხარის მიერ გადადგმულ ნაბიჯებს.
მინისტრის პირველმა მოადგილემ ყურადღება გაამახვილა იმ პრობლემებზე, რომლებიც არსებობს რეგიონში და ხელს უშლის BSEC-ის ფარგლებში ნაყოფიერ თანამშრომლობას. მან ხაზგასმით აღნიშნა, რომ რუსეთის ფედერაციის მიერ საქართველოს ტერიტორიის ოკუპაცია ხელს უშლის რეგიონულ ეკონომიკურ თანამშრომლობას და ნეგატიურ გავლენას ახდენს BSEC-ის ავტორიტეტზე.
საგარეო საქმეთა მინისტრის პირველმა მოადგილემ ასევე, აღნიშნა ისეთი რეგიონული სატრანსპორტო და ენერგეტიკული პროექტების განხორციელების მნიშვნელობა, როგორიცაა NABUCCO, AGRI, Baku-Tbilisi-Kars, რომლებიც ერთმანეთთან დააკავშირებს აღმოსავლეთსა და დასავლეთს და კიდევ უფრო გაზრდის შავი ზღვის რეგიონის სატრანზიტო პოტენციალს.
