პარლამენტის წევრები ჯონდი ბაღათურია და პეტრე მამრაძე, პარლამენტის დროებითი საგამოძიებო კომისიის შექმნას ითხოვენ. აღნიშნული ინიციატივა მათ დღეს ჟურნალისტებს ერთობლივ ბრიფინგზე გააცნეს.
"უნდა შეიქმნას პარლამენტის დროებითი საგამოძიებო კომისია, რომელიც 2007 წლის 7 ნოემბრის საპროტესტო აქციის, ტელეკომპანია "იმედის" და 2011 წლის 26 მაისის აქციის დარბევის და ძალის გადამეტების ფაქტებს შეისწავლის", - განაცხადა ბაღათურიამ.
პარლამენტის რეგლამენტის 55-ე მუხლის თანახმად, დროებითი საგამოძიებო კომისიის შექმნის ინიციატივის უფლება აქვს პარლამენტის თავმჯდომარეს, პარლამენტის კომიტეტს, ფრაქციას ან პარლამენტის წევრთა არანაკლებ ერთ მეოთხედს.
ჯონდი ბაღათურიასა და პეტრე მამრაძის ინიციატივას დროებითი საგამოძიებო კომისიის შექმნის თაობაზე ამ დროისთვის მხოლოდ თამაზ დიასამიძე და კარლო კოპალიანი უჭერს მხარს.
