„დემოკრატიული მოძრაობა - ერთიანი საქართველოს" ლიდერი ნინო ბურჯანაძე საქართველოს ხელისუფლების უმაღლესი პირებისა და რიგი ტელეკომპანიებისა და ჟურნალისტების წინააღმდეგ ორს სარჩელ სამზადებს.
ამის შესახებ ბურჯანაძემ მოძრაობის ოფისში "სახალხო კრების" აღმასრულებელი საბჭოს სხდომის შემდეგ განაცხადა.
"მე შევიტან სარჩელს საქართველოს ხელისუფლების უმაღლესი პირების წინააღმდეგ იმის გამო, რომ ისინი იტყუებიან და თუ ისინი დაამტკიცებენ, რომ არ იტყუებიან, მაშინ რატომ არ აღკვეთეს მათ დროულად სახელმწიფო გადატრიალების მცდელობა. ასევე, მეორე სარჩელს სტრასბურგის სასამართლოში შევიტან ტელეკომპანიებისა და რიგი ჟურნალისტების წინააღმდეგ, რომლებიც პირდაპირი თანამონაწილენი არიან იმ ქმედებებისა, რასაც სააკაშვილის რეჟიმი ჩადის. მაინტერესებს, რატომ არ მოვიდნენ დღეს აქ "რუსთავი-2"-ის და ტელეკომპანია "იმედის" ჯგუფები. მათ შეეშინდათ თუ გადაწყვიტეს ყურადღება ფიროსმანის ნახატებზე გადაეტანათ?!" - განაცხადა ნინო ბურჯანაძემ.
მან ასევე აღნიშნა, რომ ამერიკული არასამთავრობო ორგანიზაციები აცხადებენ, რომ სააკაშვილმა დემოკრატიული პროტესტი დაარბია.
მისივე შეფასებით, მიუხედავად იმისა, რომ საზღვარგარეთ საქართველოს ხელისუფლება პიარისთვის უზარმაზარ თანხებს ხარჯავს, ამ მხრივ ხელისუფლებას მძიმედ აქვს საქმე.
