"საქართველოს ტყის კოდექსში" შეტანილი ცვლილებებით სახელმწიფო ტყის ფონდის ტერიტორიაზე ხე-ტყით სარგებლობის ახალი რეგულაციები დაწესდა. ამის შესახებ იმსჯელეს დღეს გარემოს დაცვისა და ბუნებრივი რესურსების კომიტეტის გასვლით სხდომაზე, რომელიც დმანისში გაიმართა.
ახალი რეგულაციით, გამარტივდა პროცედურები, რომლებიც ხე-ტყის პირადი მოხმარებისთვის იყო აუცილებელი. ახლებურად განისაზღვრა მრგვალი ხე-ტყის მოძრაობასთან და პირველად გადამუშავებასთან დაკავშირებული სამართლებრივი ურთიერთობები. მრგვალი ხე-ტყის აღრიცხვა მარკირებით ანუ სპეციალური ფირნიშის საშუალებით მოხდება. სპეციალური ფირნიში დაადასტურებს საქართველოს კანონმდებლობით გათვალისწინებულ შემთხვევებში მრგვალი ხე-ტყის კანონიერ წარმოშობას და აღრიცხავს მას. მკაცრ კონტროლს დაექვემდებარა საქართველოს ტყის ფონდის ტერიტორიაზე ხე-ტყის დამზადების შედეგად მიღებული მერქნული რესურსი.
ახალი კანონმდებლობით გამარტივდა მოსახლეობის ხელმისაწვდომობა სათბობ შეშაზე. ტყის ტერიტორიაზე იქმნება სპეციალურად შემოსაზღვრული ადგილები-ტყეკაფები, სადაც მოსახლეობას საშუალება ექნება მოჭრას რეინჯერების მიერ მონიშნული ხეები. თუ მანამდე მოქმედი კანონმდებლობა 1 ოჯახს მხოლოდ 5 კუბური მეტრი მოცულობის შეშის ჭრის უფლებას აძლევდა, ახალი კანონმდებლობით, ეს შეზღუდვები მოიხსნა და ოჯახს შეუძლია მოჭრას საშეშე მასალა გასათბობად მისთვის აუცილებელი რაოდენობით. კომიტეტის თავმჯდომარის, აკაკი ბობოხიძის განმარტებით, თუ ტყე სწორად მოიჭრება, ეს ხელს შეუწყობს ჯანმრთელი ახალგაზრდა ხეების ზრდასა და განვითარებას.