ლიბიის პრეზიდენტი მუამარ კადაფი მზადაა შეწყვიტოს ცეცხლი და დაიწყოს დიპლომატიური მოლაპარაკებები ოპოზიციის წარმომადგენლებთან.
ამის შესახებ განცხადება გააკეთა სამხრეთ აფრიკის პრეზიდენტმა ჯეიკობ ზუმამ, რომელიც ტრიპოლში იმყოფებოდა და აწარმოებდა სამშვიდობო მოლაპარაკებას კადაფის ძალებსა და ლიბიის ნაციონალურ გარდამავალ საბჭოს შორის.
ადრე ლიბიის ოპოზიციის წარმომადგენლებმა არაერთხელ განაცხადეს, რომ არ აპირებენ სამშვიდობო მოლაპარაკების დაწყებას, სანამ კადაფი ქვეყნის პრეზიდენტის პოსტზე იქნება.
აღსანიშნავია რომ ზუმას ვიზიტის დასრულებისთანავე NATO-ს საჰაერო ძალებმა განახორციელეს საჰაერო იერიში კადაფის მიერ კონტროლირებად ობიექტებზე. იერიში დაიწყო დღეს გამთენიისას, დაიბომბა ტრიპოლი, ქალაქ ტაჟურას შემოგარენი და ალ-ჯაფრა.