კავკასიის საკითხებში ექსპერტი მამუკა არეშიძე აშშ-ის მიერ აზერბაიჯანის სახელმწიფო გადატრიალების გეგმის არსებობას გამორიცხავს.
"გამორიცხულია ასეთი გეგმის არსებობა. აშშ-ს გარკვეული პრეტენზიები აქვს აზერბაიჯანის მიმართ, თუნდაც ადამიანის უფლებების დაცვის კუთხით და სხვა ბევრ საკითხთან დაკავშირებით, მაგრამ პრეტენზიები ისეთ ხასიათს არ ატარებს, რომ შეერთებულ შტატებსა და აზრებაიჯანს შორის უთანხმოება გამოიწვიოს", - განუცხადა "ჯი-ეიჩ-ენს" არეშიძემ.
მეტიც, ექსპერტის შეფასებით, შეერთებული შტატები აზერბაიჯანთან ურთიერთობებს უფრთხილდება კიდეც, რაზეც თუნდაც ის ფაქტი მეტყველებს, რომ ქვეყანაში საგანგებო და სრულუფლებიან ელჩად ერთ-ერთი ყველაზე გამოცდილი კადრი - მეთიუ ბრაიზა გაგზავნა.
"აზერბაიჯანსა და აშშ-ს შორის არსებობს საკმაოდ თბილი ურთიერთობა. ნუ დაგავიწყდებათ, რომ ამერიკის შეერთებულმა შტატებმა მისი ერთ-ერთი გამოცდილი ჩინოვნიკი, მეთიუ ბრაიზა გაგზავნა იქ ელჩად და საერთოდ, ვაშინგტონი დიდად უფრთხილდება ბაქოსთან მის დამოკიდებულებას", - განმარტა ექსპერტმა.
შეგახსენებთ, რომ რუსი პოლიტოლოგის, რუსეთის ისლამისტური კომიტეტის ხელმძღვანელის ჰეიდარ ჯემალის განცხადებით, აშშ აზერბაიჯანის სახელმწიფო გადატრიალების გეგმას ამუშავებს, რომლის შესრულებასაც საქართველოს შუამავლობით გეგმავს. ჰეიდარ ჯემალი ამტკიცებს, რომ აზერბაიჯანში სახელმწიფო გადატრიალებაზე პასუხისმგებელი პირი საქართველოს უშიშროების საბჭოს მდივანი გიგა ბოკერიაა.
