ეკონომიკისა და მდგრადი განვითარების მინისტრი, აზერბაიჯანელ ინვესტორებს, ქობულეთისა და ანაკლიის ტურისტულ ზონებში ინვესტირებისკენ მოუწოდებს.
აზერბაიჯანში ოფიციალურ ვიზიტად მყოფმა, ვერა ქობალიას თქმით, საქართველომ უკვე მოამზადა ხელშეკრულება აზერბაიჯანთან ტურიზმის სფეროში თანამშრომლობის გაღრმავებაზე.
„ჩვენ ტურიზმის მიმართულებით რამდენიმე შეთავაზება გვაქვს. იმედი მაქვს, რომ ეს წინადადებები აზერბაიჯანელ ბიზნესმენებს დააინტერესებთ, რადგანაც აზერბაიჯანელთა ნაწილი დასასვენებლად საქართველოში ჩამოდის"- განაცხადა ვერა ქობალიამ.
მისივე ინფორმაციით, 2010 წელს საქართველოს დაახლოებით 0,5 მლნ. აზერბაიჯანელი ტურისტი ეწვია.
„შავი ზღვის სანაპიროზე ორი ტურისტული ზონა გვაქვს, სადაც აზერბაიჯანელ ინვესტორებს მიწის უსასყიდლოდ გადაცემას და 15 წლის განმავლობაში გადასახადებისგან განთავისუფლებას ვპირდებით. ქართული მხარე თავის თავზე იღებს კომუნიკაციისა და შესაბამისი ინფრასტუქტურის მიყვანას. აზერბაიჯანელ ინვესტორებს შედსაძლებლობა აქვთ განსხვავებული არქიტექტურის პროექტები აირჩიონ, რომლებივ ევროპილი დიზაინითაა შექმნილი, ან თავიანთი პროექტებით მოვიდნენ"- განაცხადა საქართველოს ეკონომიკისა და მდგრადი განვითარების მინისტრმა.
მინისტრის თქმით, საქართველოში ტურისტული ნაკადის ზრდაა მოსალოდნელი. ქობალიას განცხადებით, ტურისტული ნაკადის ზრდის ფონზე უკვე სასტუმრო ინფრასტრუქტურის ნაკლებობაც შეინიშნება, რაც აზერბაიჯანელმა ინვესტორებმა სათავისოდ უნდა გამოიყენონ და საქართველოში ტურისტული ინფრასტრუქტურის მშენებლობით დაინტერესდნენ.
„ეს ახალი პროექტებია, თუმცა მასში ჩართვის სურვილი რამდენიმე აზერბაიჯანულმა კომპანიამ უკვე გამოთქვა. შემდგომი ეტაპია, რომ დაინტერესებული ინვესტორები საქართველოში მოვიწვიოთ და მათ ტურისტული ზონები დავათვალიერებინოთ. ეს კი ინვესტორებს შესაძლებლობას მისცემს, ადგილზე დაათვალიერონ ტურისტული ზონები და ამის შემდგომ მათთან გარკვეული დეტალები განვიხილოთ"- აღნიშნა ქობალიამ.
ქობალის თქმით, ქართულმა მხარემ აზერბაიჯანს ერთობლივი ტურისტული პაკეტების შემუშავებაც შესთავაზა.
