მასობრივი მღელვარების დაწყებამდე ცოტა ხნით ადრე ლიბიის ლიდერმა მუამარ კადაფიმ რამდენიმე მილიონი დოლარი დახარჯა ფარული პიარ-კამპანიისთვის, რაც მას მსოფლიოს თვალში ბრძენი საზოგადო მოღვაწისა და რეფორმატორის იმიჯს შესძენდა. კონფიდენციალურ დოკუმენტებზე დაყრდნობით, ამის შესახებ "სი-ენ-ენი" იუწყება.
ლიბიის "შორსმჭვრეტელმა" ლიდერმა ბოსტონში არსებული ერთ-ერთი კონსალტინგური ფირმის სპეციალისტთა ჯგუფი დაიქირავა, რომელიც მისთვის ხელსაყრელი იმიჯის რეალიზაციას შეუდგა. ჯგუფში ანალიტიკოსები, პიარ-სპეციალისტები და ყოფილი სამთავრობო ჩინოვნიკები შედიოდნენ, რომლებიც 2006 წლიდან კადაფისთან შეხვედრებს პირადად მართავდნენ და მას ლექციებს უკითხავდნენ.
2007 წლით დათარიღებული დოკუმენტის მიხედვით, პიარ-კამპანია ლიბიის საერთაშორისო აღიარებისა და კადაფის, როგორც მოაზროვნის, ინტელექტუალის წარმოჩენას ემსახურებოდა.
გავრცელებული ინფორმაციით, კადაფი ამერიკელ სპეციალისტებს ყოველწლიურად 3 მილიონ დოლარს უხდიდა. ამას ემატებოდა ლიბიაში ამერიკელთა ვიზიტების ხარჯები.
პიარჯგუფის ერთ-ერთი ანალიტიკოსის ემონ კელის თქმით, ამერიკელები "ცივილიზებული საზოგადოების" შექმნაში ეხმარებოდნენ კადაფის. კელი აცხადებს, რომ მათი კვლევის დიდი ნაწილი ლიბიაში შექმნილი სიტუაციის ანალიზს მოიცავდა, რაც რეფორმების ჩატარებას, ქვეყნის ეკონომიკური სიტუაციის გაუმჯობესებას, ხელისუფლების მოდერნიზებასა და სამოქალაქო საზოგადოების შექმნას ემსახურებოდა.
"ჩვენ კადაფისთვის კი არა, ლიბიისთვის ვმუშაობდით",_განუცხადა "სი-ენ-ენს" ემონ კელიმ.
