საქართველოს პრეზიდენტი მიხეილ სააკაშვილი საჩხერის რაიონს სტუმრობს. ამ წუთებში ქვეყნის პირველი პირი პოეტ მუხრან მაჭავარიანის მშობლიურ სოფელ არგვეთში იმყოფება და ადგილობრივ მოსახლეობას ხვდება.
"მუხრან მაჭავარიანის ლექსები არა მხოლოდ ჩემი, არამედ თითოეული ჩვენგანის გენეტიკური კოდის ნაწილია. დიდი ხელოვანები ალბათ ისევ დაიბადებიან, თუმცა მაქვს განცდა, რომ იმ დონის პოეტები, როგორებიც იყვნენ მე-20 საუკუნეში: გალაკტიონ ტაბიძე, ტიციან ტაბიძე, მუხრან მაჭავარიანი... უფრო ადრე - მე-19 საუკუნეში: ვაშა-ვშაველა, ილია ჭავჭავაძე და სხვები, აღარ... ძალიან ვნანობ, რომ მუხრან მაჭავარიანს ვერ გადავუხადეთ იუბილე... თუმცა, აქ ჩამოვედი, მისი დანაპირების შესასრულებლად", - განაცხადა მიხეილ სააკაშვილმა და აქვე განმარტა, რომ უდიდესი ქართველი პოეტის უკანასკნელი თხოვნა ის იყო, რომ მის სოფელს სასმელი წყალი ჰქონოდა.
პრეზიდენტ სააკაშვილის თქმით, სოფელ არგვეთში სასმელი წყლის პრობლემა უკვე მოგვარებულია და ამით მუხრან მაჭავარიანის სურვილი შესრულებული.
"თუმცა მას ჰქონდა კიდევ მეორე სურვილი, რომ დამპყრობლებს დაეტოვებინა საჩხერის ოკუპირებული სოფელი და ამ სოფლიდან ისინი გავიდნენ. ასევე გავლენ სხვა სოფლებიდანაც", - აღნიშნა სააკაშვილმა.