საქართველოს პრეზიდენტმა მიხეილ სააკაშვილმა "ბათუმი შერატონის" დასრულებული ნაწილის გახსნის საზეიმო ცერემონიალზე სასტუმროს მფლობელს სიმბოლურ საჩუქრად "ბოროტების დაბრმავებული თვალი" ანუ ძველი პროჟექტორი გადასცა და განაცხადა, რომ ძალიან მალე დადგება ის დრო, ჩვენ ყველანი ერთად შევკრიბავთ ამ ძველ პროჟექტორებს და ჯართში ჩავაბარებთ.
"ამ სანაპიროზე ბუდობდა გველეშაპი, რომელსაც ბევრი საცეცი ჰქონდა. ერთ ერთი მოჭრილი საცეცი აქ არის სიმბოდურად მოტანილი. ეს საცეცები და გველეშაპის თვალი ადამიანებს თავისუფალი ცხოვრების საშუალებას არ აძლევდა. ერთადერთი რასაც ხედავდა ჩვენი მილიონობით თანამოძმე საზღვრის მეორე მხრიდან და ერთადერთი რაც მათ თვალს ჭრიდა და არაფრის სხვის დანახვის საშუალებას არ აძლევდა იყო გველეშაპის მიერ აქ დამონტაჟებული თვალები",_ განაცხადა მიხეილ სააკაშვილმა და დასძინა, რომ "საქართველომ ამ გველეშაპის საცეცები ჩაჭრა, თუმცა საცეცი საქართველოს კიდევ რამდენიმე ადგილზე მოეხვია.
"დღეს ეს საცეცი ჩვენ გვაშორებს აქედან რამდენიმე ათეული კილომეტრში ჩვენი სამშობლოს მეორე ნაწილთან, რომელიც დაპყრობილია და განადგურების პროცესში იმყოფება ძალიან დაუნდობელი ოკუპანტის მიერ",_ განაცხადა პრეზიდენტმა.
მისივე თქმით, ეს არის ახალი ბერლინის კედელი, მავთულხლართები და პროჟექტორები, არა იმისათვის, რომ ვიღაცას გზა გაუნათოს არამედ იმისათვის, რომ დააბრმავოს.
"მოსახლეობის 20 % დარჩა ცხინვალის რეგიონში იმისა რაც იყო თუნდაც 2008 წლის ზაფხულმდე და 10% იმისა რაც იყო თავის დროზე. მოსახლეობის 20 % ზე ნაკლები დარჩა ასევე ულამაზეს აფხაზეთში, მაგრამ დადგება დრო, ძალიან მალე, როდესაც ჩვენ ყველანი ერთად, რკინის ფარდის მიღმა დარჩენილ ჩვენს უმცირესობასთან ერთად ამ პროჟექტორებს შევკრიბავთ და ერთად ჩავაბარებთ ჯართში", _ განაცხადა მიხეილ სააკაშვილმა.
