საქართველოში რადიაციული ფონის გაზრდა მოსალოდნელი არ არის. როგორც ბირთვული და რადიაციული სამსახურის უფროსმა ზაალ ლომთაძემ "ჯი-ეიჩ-ენს" განუცხადა, საქართველოში რადიაციული ფონის მომატება არსად დაფიქსირებულა.
მისი თქმით, იაპონიაში შექმნილი რთული ბირთვული ვითარების მიუხედავად, საქართველოში რადიაციული ფონის მომატება მოსალოდნელი არაა.
"იაპონიაში შექმნილი რთული ვითარების მიუხედავად საქართველოში რადიაციული ფონის მომატება არაა მოსალოდნელი და შესაბამისად არც რაიმე საგანგებო ზომების მიღებაა საჭირო. მეტეოროლოგიური სამსახური ყოველდღიურად ამოწმებს რადიაციის დონეს. შემოწმებების შემდეგ საქართველოში არსად გამოვლენილა მომატებული რადიაცია. შემოწმება ხორციელდება საკვებ პროდუქტებზეც. საბაჟოზე სპეციალური დეტექტორები დგას, რომელიც ქვეყანაში შემოსული ტვირთებს ამოწმებს და რადიაცია არცერთ მათგანზე არ დაფიქსირებულა", - განუცხადა "ჯი-ეიჩ-ენს"ლომთაძემ.
მისი თქმით, ჯანდაცვის სამინისტროს განკარგულების თანახმად, იაპონიიდან ჩამოსმული ადამიანები რადიაციის აღმოჩენის კუთხით არ შემოწმებულან, რადგან ისინი უსაფრთხო რეგიონებში ცხოვრობდნენ.
შეგახსენებთ, რომ იაპონიაში 11 მარტს მომხდარი ძლიერი მიწისძვრისა და ცუნამის შედეგად მნიშვნელოვნად დაზიანდა ფუკუშიმას ატომური ელექტროსადგური, რის შედეგადაც ქვეყანაში რადიაციის ფონი ძალიან გაიზარდა. რადიაციის ფონის მომატება დაფიქსირდა ამერიკის შეერთებულ შტატებში, ასევე შვეიცარიასა და დიდ ბრიტანეთში.
