აღსრულების ეროვნულ ბიუროსა და ქუთაისის აკაკი წერეთლის სახელმწიფო უნივერსიტეტს შორის ურთიერთთანამშრომლობის მემორანდუმი გაფორმდა. მემორანდუმის გაფორმებას აღსრულების ეროვნული ბიუროს თავმჯდომარის მოადგილე - ერეკლე ღვინიანიძე, ქუთაისის სახელმწიფო უნივერსიტეტის რექტორი - გიორგი ღავთაძე, საზოგადოებრივ მეცნიერებათა ფაკულტეტის დეკანი - გოდერძი ვაჭრიძე და ამავე უნივერსიტეტის იურიდიული ფაკულტეტის სტუდენტები დაესწრნენ.
ურთიერთთანამშრომლობის მემორანდუმს ხელი მოაწერეს აღსრულების ეროვნული ბიუროს თავმჯდომარის მოადგილემ - ერეკლე ღვინიანიძემ და ქუთაისის აკაკი წერეთლის სახელმწიფო უნივერსიტეტის რექტორმა - გიორგი ღავთაძემ.
აღსრულების ეროვნული ბიუროს თავმჯდომარის მოადგილის, ერეკლე ღვინიანიძის თქმით, ანალოგიური მემორანდუმი აღსრულების ეროვნულმა ბიურომ თბილისის სახელმწიფო უნივერსიტეტსა და სოხუმის უნივერსიტეტთან უკვე გააფორმა.
მემორანდუმის ფარგლებში, აღნიშნული უნივერსიტეტების იურიდიული ფაკულტეტის დამამთავრებელი კურსისა და მაგისტრატურის სტუდენტები სააღსრულებო ბიუროებში პრაქტიკულ სასწავლო კურსებს უკვე გადიან. დღეს გაფორმებული მემორანდუმის თანახმად კი 2011-2012 სასწავლო წლებში აღსრულების ეროვნულ ბიუროში პრაქტიკული სასწავლო კურსების გავლა ქუთაისის აკაკი წერეთლის სახელმწიფო უნივერსიტეტის სტუდენტებსაც შეეძლებათ.
აღსრულების ეროვნული ბიურო ანალოგიურ მემორანდუმებს მომავალში საქართველოში აკრედიტებულ სხვა უმაღლეს სასწავლებლებთანაც გააფორმებს.
