დღეს, 30 მარტს, 14:00 საათზე, ცენტრალური საარჩევნო კომისია, ეთნიკური უმცირესობების წარმომადგენლებს უმასპინძლებს. კომისია სტუმრებს საარჩევნო ადმინისტრაციის მუშაობის პროცესს გააცნობს და მათთვის აქტუალურ საკითხებზე დისკუსიას გამართავს. აღნიშნული აქტიური მოქალაქეები ცესკოს "საარჩევნო სისტემების განვითარების, რეფორმებისა და სწავლების ცენტრის" მიერ გაცემული გრანტის ფარგლებში იქნენ გამოვლენილნი. მცირე გრანტებითა და სამოქალაქო განათლების პროექტების განხორციელებით ცესკო საარჩევნო გარემოს გაუმჯობესებას უწყობს ხელს.
2011 წელს ადმინისტრაცია გეგმავს სამოქალაქო განათლების კუთხით საინტერესო პროექტების განხორციელებას. მსგავსი საქმიანობით ცესკო ხელს შეუწყობს საარჩევნო საკითხებთან დაკავშირებით მოქალაქეების ცნობიერების ამაღლებასა და მათი მხრიდან ადმინისტრაციისადმი ნდობის ხარისხის გაზრდას.
სტუმრები შეხვდებიან ცესკოს ადმინისტრაციის წარმომადგენლებს, დაათვალიერებენ ცესკოს შენობას, გაეცნობიან დეპარტამენტების საქმიანობას და პირადად მოიძიებენ საკუთარ თავს ამომრჩეველთა ერთიან სიაში.
ეთნიკური უმცირესობების წარმომადგენლები მოაწყობენ ინსცენირებული ხმის მიცემის პროცედურას, რომელშიც თავად შეასრულებენ უბნის კომისიის წევრების როლს, ხოლო ცესკოს წევრები ამომრჩევლებს განასახიერებენ.
ღონისძიების დასასრულს ცესკოს თავმჯდომარე პროექტის მონაწილეებს სერტიფიკატებს გადასცემს.
