უკრაინის უმაღლესი განათლების დაწესებულებებში ქართველ სტუდენტებს სწავლის რეგისტრაციის გაგრძელების სანაცვლოდ საქართველოში დასაბრუნებელი ბილეთების წარდგენას სთხოვენ. ამის შესახებ "ჯი-ეიჩ-ენს" უკრაინის პოსტდიპლომური განათლების შუპიკის სახელობის სამედიცინო აკადემიიდან ქართველმა სტუდენტებმა აცნობეს.
როგორც უკრაინის პოსტდიპლომური განათლების შუპიკის სახელობის სამედიცინო აკადემიის კლინიკურ ორდინატორები აცხადებენ, აკადემიაში ქართველ სტუდენტებს განუცხადეს, რომ უკრაინის განათლების მინისტრის გადაწყვეტილებით, "ამიერიდან მათ არ გაუგრძელდებათ რეგისტრაციის ვადა თუ არ წარადგენენ სამშობლოში დასაბრუნებელ ღია ბილეთს".
"ეს ეხება ყველას მაგისტრანტს იმის განურჩევლად, ვის რამდენი წელი დარჩა სწავლის დასრულებამდე. ეს ყველაფერი კი დაიწყო მას შემდეგ რაც ქართველი სტუდენტი, 24 წლის სერგი გოგია მოკლეს კიევში, რომელიც ამ აკადემიაში სწავლობდა. ადმინისტრაციის განცხადებით, ბრძანება ადრე ეხებოდა ყველა უცხოელს, ქართველი სტუდენტების გარდა და ახალი ბრძანების საფუძველზე ცვლილებები ქართველებსაც შეეხო", - აცხადებენ ქართველი სტუდენტები.
ამასთან, ისინი განმარტავენ, რომ აღნიშნული ნორმა მათ მიერ აკადემიასთან გაფორმებულ ხელშეკრულებაში არც ადრე და არც ახლა არ სწერია.
გარდა ამისა, რეგისტრაციის გაგრძელების მიზნით ქართველ სტუდენტებს ევალებათ 115 გრივნის გადახდა და რეგისტრაციის ვადის ხანგძლივობას 6 თვის ნაცვლად მხოლოდ 3 თვით უგრძელებენ.
ამასთან, აკადემიის ადმინისტრაცია უცხოელ სტუდენტებს "ხელიდან ხელში" პრინციპით, რეგისტრაციის გარეშე ახდევინებს დაზღვევის თანხას 500 გრივნის ოდენობით, თუმცა ამ დრომდე ვერ დადგინდა, რა სახის დაზვღვევისთვის იხდიან აკადემიის სტუდენტები აღნიშნულ თანხას.
ქართველი სტუდენტები დახმარებას საგარეო საქმეთა სამინისტროს და უკრაინაში საქართველოს საელჩოს სთხოვენ, რათა წარმოქმნილ გაუგებრობის გარკვევაში დაეხმარნენ.
