აღსრულების ეროვნულმა ბიურომ, აქცია „მწვანე ყუთის" ფარგლებში, სპორტისა და ახალგაზრდულ საქმეთა სამინისტროს ბავშვთა და ახალგაზრდობის ცენტრს 1,5 ტონა მაკულატურას გადასცა. მაკულატურის გადაცემის პროცესს აღსრულების ეროვნული ბიუროს თავმჯდომარის მოადგილე - ერეკლე ღვინიანიძე და სპორტისა და ახალგაზრდულ საქმეთა სამინისტროს ბავშვთა და ახალგაზრდობის ეროვნული ცენტრის დირექტორის მოდგილე - ანა საბახტარიშვილი დაესწრნენ.
აღსრულების ეროვნული ბიუროს თავმჯდომარის მოადგილის - ერეკლე ღვინიანიძის თქმით, აღსრულების ეროვნული ბიურო პროექტ „მწვანე ყუთის" მხარდაჭერას მომავალშიც გააგრძელებს და სპორტისა და ახალგაზრდული სამინისტროს მიერ ორგანიზებულ აქციას ტერიტორიული ბიუროების მასშტაბით შეუერთდება.
აქციაში „მწვანე ყუთი" აღსრულების ეროვნულმა ბიურომ მონაწილეობა მეორედ მიიღო. პროექტის ფარგლებში, აღსრულების ეროვნული ბიუროს თანამშრომლებმა დაახლოებით ერთი თვის წინ ქაღალდის გადამამუშავებელ საწარმოს შპს. „ლ.მ.ს."-ს შემდგომი გადამუშავების მიზნით, 1500 კგ მაკულატურა გადასცეს.
პროექტ „მწვანე ყუთის" მიზანია მოსახლეობაში მაკულატურის შეგროვებისა და გადამუშავების კულტურის დამკვიდრება, ქაღალდის პარკების გამოყენების პოპულარიზაცია და ახალგაზრდებში მოხალისეობრივი სერვისის განვითარება, ასევე ქაღალდის დამზადებისათვის საჭირო ბუნებრივი რესურსების განადგურების თავიდან აცილება.
პროექტ „მწვანე ყუთს" ახორციელებს სპორტისა და ახალგაზრდობის საქმეთა სამინისტროს დაქვემდებარებული უწყება სსიპ „ბავშვთა და ახალგაზრდობის ეროვნული ცენტრი".