ეკონომიკისა და მდგრადი განვითარების სამინისტრო ე. წ. არამიანცის კომპლექსში შემავალ კიდევ 3 საავადმყოფოს ყიდის. ვერა ქობალიას უწყებამ საპრივატიზაციოდ უკვე გამოიტანა "კარდიოლოგიური კლინიკის", "აკ. ვ. ივერიელის სახელობის ენდოკრინოლოგია-მეტაბიოლოგია-დიეტოლოგიის ცენტრი, შპს "ენმედიცისა" და "კარდიოლოგიური კლინიკის" სახელმწიფო საკუთრებაში არსებული 100% წილი, რომლის გასხვისებასაც ეკონომიკის სამინისტრო, 10 მარტისთვის დაგეგმილ, ელექტრონულ აუქციონზე მოახდენს.
სამინისტროს ინფორმაციით, "კარდიოლოგიური კლინიკის" საწყისი ღირებულება 120 ათასი ლარია და ობიექტს 23114.30 ლარის დებიტორული და 38598.50 ლარის კრედიტორული დავალიანება აქვს. მისი საწესდებო კაპიტალი კი 105548 ლარადაა განსაზღვრული.
"აკ. ვ. ივერიელის სახელობის ენდოკრინოლოგია-მეტაბიოლოგია-დიეტოლოგიის ცენტრი, შპს "ენმედიცის" საწყისი ღირებულება კი 380 ათას ლარს შეადგენს. მეტაბიოლოგია-დიეტოლოგიის ცენტრის საწესდებო კაპიტალი 336308 ლარია და მას 7075 ლარის დებიტორული და 37407 ლარის კრედიტორული დავალიანება აქვს.
"კარდიოლოგიური კლინიკის" საწყისი ღირებულება კი ეკონომიკის სამინისტროს 120 ათას ლარად აქვს შეფასებული. ობიექტის საწესდებო კაპიტალი 105548 ლარს შეადგენს და მას 23114.30 ლარის დებიტორული და 38598.50 ლარის კრედიტორული დავალიანება აქვს.
2 მარტისთვის დაგეგმილ აუქციონზე ვერა ქობალიას უწყება, "არამიანცის" კომპლექსში შემავალი ოთხი სამედიცინო დაწესებულების გასხვისებასაც გეგმავს.
შეგახსენებთ, რომ ეკონომიკისა და მდგრადი განვითარების სამინისტროს მიერ საპრივატიზაციოდ გამოტანილი, ე. წ. არამიანცის კომპლექსში შემავალი 6 კლინიკის მფლობელი დანიელ გუფთა გახდა. ეკონომიკისა და მდგრადი განვითარების სამინისტროში განმარტავენ, რომ დანიელ გუფთა კომპანია "ამტელ-პროპერტიეს" ერთ-ერთი დირექტორია.
გუფთამ ეკონომიკისა და მდგრადი განვითარების სამინისტროსგან 330 ათას ლარად "ზოგადი თერაპიის კლინიკა", 740 ათას ლარად შპს "ძმები ზუბალაშვილების სახელობის პედიატრიული კლინიკა", 500 ათას ლარად შპს "თვალის სნეულებათა კლინიკა მზერა", 720 ათას ლარად "გინეკოლოგიური კლინიკა", 55 ათას ლარად "ანესთეზიოლოგიური კლინიკა" და 2 მლნ. 100 ათას ლარად "თორაკო-აბდომინალური კლინიკის" მფლობელიც გახდა.
