ისრაელის პრემიერ-მინისტრმა ბენიამინ ნეთანიაჰუმ განაცხადა, რომ ჯერ ნაადრევია იმის დადგენა, ვინ იდგა დუბაიდან თელ-ავივის მიმართულებით Flydubai-ის რეისზე მომხდარი ინციდენტის უკან.
ნეთანიაჰუს თქმით, თავდასხმაში ბრალდებული პილოტი ამჟამად საუდის არაბეთში იკითხება, ხოლო მოგვიანებით შესაძლოა მისი გადაყვანა არაბთა გაერთიანებულ საამიროებში მოხდეს. ისრაელი გამოძიებას თვალს მიადევნებს და, საჭიროების შემთხვევაში, მასში მონაწილეობასაც მიიღებს.
„ჯერ ნაადრევია ამის თქმა. თავდამსხმელ პილოტს ახლა საუდის არაბეთში იძიებენ. ვფიქრობ, მას არაბეთის გაერთიანებულ საამიროებში გადაიყვანენ, რადგან ის იქიდან არის ან, ყოველ შემთხვევაში სწორედ იქიდან გაემგზავრა. ჩვენ თვალს მივადევნებთ გამოძიებას და შესაძლოა, მასში მონაწილეობაც მივიღოთ“, - განაცხადა ნეთანიაჰუმ Fox News-თან ინტერვიუში.
ნეთანიაჰუს თქმით, ამ ინციდენტს შეიძლებოდა, „კიდევ ერთი 11 სექტემბერი“ გამოეწვია.
„დუბაიდან ისრაელისკენ მიმავალ რეისზე, ისრაელთან მიახლოებისას, ერთი პილოტი მეორეს თავს დაესხა. როგორც ჩანს, დანა დაარტყა. ის სისხლს კარგავდა. თვითმფრინავმა კონტროლი დაკარგა და ცხვირით ჩამოვარდნა დაიწყო“, – თქვა ნეთანიაჰუმ.
ცნობისთვის, პილოტებს შორის დაპირისპირების გამო, დუბაი-თელ ავივის რეისი საუდის არაბეთში დაჯდა. ინციდენტისას თვითმფრინავმა „უკანონო ჩარევისა“ და საგანგებო მდგომარეობის შესახებ სიგნალები გაგზავნა. მომხდარის შემდეგ თვითმფრინავი ტაბუკის აეროპორტში დაეშვა. ისრაელის მედიის ცნობით, ისრაელში სულ უფრო მეტად განიხილავენ ვერსიას, რომ Flydubai-ის რეისზე საგანგებო შემთხვევა ტერორისტული თავდასხმის მცდელობა იყო.
