რუსეთის პრეზიდენტმა ვლადიმირ პუტინმა და აშშ-ის პრეზიდენტმა დონალდ ტრამპმა სატელეფონო საუბრისას ამერიკელი წარმომადგენლების, სტივ უიტკოფისა და ჯარედ კუშნერის, მოსკოვსა და კიევში ვიზიტები განიხილეს. ამის შესახებ კრემლის პრეზიდენტის თანაშემწემ იური უშაკოვმა განაცხადა. იუწყება Reuters
უშაკოვის ინფორმაციით, პუტინმა და ტრამპმა უიტკოფისა და კუშნერის ვიზიტების შედეგები დადებითად შეაფასეს. აშშ-ის პრეზიდენტის წარმომადგენლები გასულ დღეებში მოსკოვსა და კიევში იმყოფებოდნენ უკრაინის ომის დასრულების საკითხზე მოლაპარაკებების ფარგლებში.
უშაკოვის თქმით, ტრამპმა ხაზი გაუსვა უკრაინის ომის რაც შეიძლება სწრაფად დასრულების აუცილებლობას და აღნიშნა, რომ ეს აშშ-სა და რუსეთს შორის ურთიერთობების სრულად აღდგენის შესაძლებლობას შექმნიდა.
უშაკოვის განცხადებით, ტრამპს სურს, უკრაინის ომის დასრულების მიმართულებით გარღვევა მისი პრეზიდენტობის პერიოდში მოხდეს. პუტინმა, მისი თქმით, ამ მიდგომას მხარი დაუჭირა.
მედიის ონფორმაციით, პუტინმა მხარი დაუჭირა ტრამპის განზრახვას, ქვეყნებს შორის კონსტრუქციული პარტნიორობა დაამყაროს.
კრემლის ლიდერმა ასევე განაცხადა, რომ „რუსეთი ევროპასთან მიმართებით მტრულ გეგმებზე არც კი ფიქრობს“.
საუბრისას მხარეები შეთანხმდნენ, რომ კონტაქტზე დარჩებიან და საჭიროების შემთხვევაში ერთმანეთს ტელეფონით დაუკავშირდებიან.
