აშშ-ის პრეზიდენტ დონალდ ტრამპის ადმინისტრაცია ომის შემდგომი სტრატეგიის შემუშავებაზე მუშაობს, რომლის მიზანი რეგიონული ძალისხმევის გაძლიერება იქნება ირანის შეკავებისა და ისრაელსა და მის მეზობელ ქვეყნებს შორის ურთიერთობების ნორმალიზების გაფართოების მიმართულებით.
ამის შესახებ Axios ორ ამერიკელ მაღალჩინოსანსა და კიდევ ორ წყაროზე დაყრდნობით წერს.
გამოცემის ინფორმაციით, გეგმა ჯერ შემუშავების საწყის ეტაპზეა და მისი მიზანია განსაზღვროს, როგორი იქნება აშშ-ის პოლიტიკა ახლო აღმოსავლეთში ირანთან ომის დასრულების შემდეგ.
ამერიკელი ოფიციალური პირების განცხადებით, სტრატეგიაზე მუშაობა მიმდინარეობს როგორც ტრამპის ადმინისტრაციის უმაღლეს პოლიტიკურ დონეზე, ისე უწყებებს შორის სამუშაო დონეზე.
წყაროების ცნობით, ბოლო რამდენიმე კვირის განმავლობაში ტრამპმა მრჩევლებთან ორი შეხვედრა გამართა, სადაც გეგმა განიხილეს და სხვადასხვა იდეა გაჟღერდა.
გამოცემის ცნობით, სტრატეგიის შესაძლო შემადგენელ ნაწილებად სამი ძირითადი მიმართულება განიხილება:
- აშშ-ის მოკავშირეებს შორის რეგიონული ალიანსის შექმნა ირანის შეკავების მიზნით, რომლის გარანტორის როლსაც აშშ შეასრულებს;
- კოორდინირებული ძალისხმევის განხორციელება 7 ოქტომბრის თავდასხმების შედეგად რეგიონში წარმოქმნილი პრობლემების დარეგულირების დასასრულებლად - მათ შორის, ღაზის სექტორთან დაკავშირებით ტრამპის გეგმის შემდეგი ეტაპის განხორციელების უზრუნველყოფით, ისრაელსა და სირიას შორის უსაფრთხოების შეთანხმების გაფორმებით და ისრაელსა და ლიბანს შორის არსებული შეთანხმების შესრულებით;
- "აბრაამის შეთანხმებების" (ისრაელსა და არაბულ სახელმწიფოებს შორის ურთიერთობების ნორმალიზების შესახებ ხელშეკრულებების სერია) გაფართოება და საუდის არაბეთსა და ისრაელს შორის ურთიერთობების ნორმალიზების შესახებ შეთანხმების დადება.
ტრამპის ადმინისტრაცია იმედოვნებს, რომ 27 ოქტომბრის არჩევნების შემდეგ ჩამოყალიბებული ისრაელის ახალი მთავრობა ომის შემდგომი სტრატეგიის ფარგლებში თანამშრომლობისთვის უნარიანი იქნება.
ერთ-ერთი წყაროს განცხადებით, ახალი სტრატეგიის შემუშავებას კიდევ რამდენიმე კვირა დასჭირდება.
„ისინი მას ამზადებენ, მაგრამ ჯერ მზად არ არის. იდეა მდგომარეობს იმაში, რომ რეგიონში არსებული საკითხების მთელი რიგი ერთმანეთთან დააკავშირონ - როგორ შეიქმნას ომის შემდეგ რეგიონული ალიანსი. ჯერჯერობით უცნობია, შეუერთდება თუ არა მას რეგიონში აშშ-ის ყველა მოკავშირე“, - აღნიშნა წყარომ.
