საქართველომ და თურქეთმა რამდენიმე ენერგეტიკული პროქტის განხორციელებაზე შეთანხმება გააფორმეს. საქართველოს სახელმწიფო ენერგოსისტემის ინფორმაციით, საქართველოსა და თურქეთის ენერგეტიკის მინისტრების მიერ 2010 წლის 29 სექტემბერს ხელმოწერილი "პარალელური რეჟიმის შესახებ ურთიერთგაგების მემორანდუმის" შესაბამისად, მიმდინარე წლის 18 თებერვალს, სამუშაო ვიზიტის ფარგლებში, თბილისში ერთმანეთს შეხვდნენ თურქეთის ელექტროენერგიის გადაცემის ქსელის ტექნიკური ოპერატორის ("თეიაში"), "საქართველოს სახელმწიფო ელექტროსისტემისა" და "ენერგო პრო ჯორჯიას" წარმომადგენლები. მხარეებმა განიხილეს და შეაფასეს მემორანდუმის განხორციელების შედეგები.
ქართულმა მხარემ გააკეთა ორი პრეზენტაცია: "2013 წლისთვის საქართველოსა და აზერბაიჯანიდან თურქეთის მიმართულებით ელექტროენერგიის ექსპორტის შესაძლებლობების ანალიზი" და "საქართველოს ელექტროენერგეტიკური ქსელის შემდგომი გაფართოება 2012-2017 წლებში", ხოლო თურქულმა მხარემ გააკეთა პრეზენტაცია თემაზე: "საქართველო-თურქეთის მაღალი ძაბვის მაკავშირებლის ტექნიკური შესაძლებლობები (ბორჩხა-ახალციხის მაღალი ძაბვის მაკავშირებელი მუდმივი დენის ჩანართით ახალციხის ქვესადგურში და მურატლი-ბათუმის მაღალი ძაბვის მაკავშირებელი მუდმივი დენის ჩანართით ბათუმის ქვესადგურში)".
ხელი მოეწერა ახალი, 154-კილოვატიანი ელექტროგადამცემი ხაზის - ბათუმი (საქართველო) - მურატლი (თურქეთი) მშენებლობის ხელშეკრულებას, რომელსაც საქართველოს მხარეს ექნება სადგური მუდმივი დენის ჩანართით. მშენებლობის ხელშეკრულებას "საქართველოს სახელმწიფო ელექტროსისტემის" მხრიდან ხელი მოაწერა მმართველთა საბჭოს თავმჯდომარემ, სულხან ზუმბურიძემ, "თეიაშის" მხრიდან - მმართველთა საბჭოს თავმჯდომარემ/გენერალურმა დირექტორმა ქემალ ილდირმა და "ენერგო პრო ჯორჯიას" მხრიდან - გენერალურმა დირექტორმა - რადოსლავ დუდოლენსკიმ.
"მშენებლობის ხელშეკრულების გაფორმება ამ ახალი ხაზის პროექტზე ნიშნავს მისი პრაქტიკული რეალიზაციის ფაზაში გადასვლას, რის შედეგადაც უახლოესი წლების განმავლობაში ბათუმი-მიურატლის ახალი 154 კვ-იანი ხაზი მუდმივი დენის ჩანართით მწყობრში უნდა შევიდეს. ახალი ხაზი წინასწარი მონაცემებით შეძლებს დაახლოებით 350 მგვტ ელექტროენერგიის გატარებას, რაც საგრძნობლად ზრდის საქართველოდან თურქეთის ენერგოსისტემაში ელექტროენერგიის ექსპორტის ტექნიკურ შესაძლებლობებს, აგრეთვე ხელს უწყობს ინვესტორთა დაინტერესებას საქართველოში ელექტროენერგიის მწარმოებელი ახალი სადგურების პროექტებით", - განაცხადა "საქართველოს სახელმწიფო ელექტროსისტემის" რეაბილიტაციის მმართველმა, სულხან ზუმბურიძემ.
გარდა ამისა, შეხვედრაზე გაფორმდა ახალციხე (საქართველო) - ბორჩხა (თურქეთი) 400 კვ-იანი მშენებარე ელექტროგადამცემ ხაზზე 2009 წელს გაფორმებული მშენებლობის ხელშეკრულების ბოლო დანართი - განხორციელების გეგმა-ცხრილი (ამ დანართს ხელი მოაწერეს სსე-ისა და თეიაშ-ის წარმომადგენლებმა), რომელშიდაც დეტალურად და ზუსტი ვადების ფიქსირებით განისაზღვრა ხაზის მშენებლობის ცალკეული ეტაპები საქართველოს და თურქეთის მხარეს. ამ ახალი დოკუმენტით კიდევ ერთხელ განისაზღვა მხარეთა სრული მზადყოფნა, ხაზის მშენებლობის პროცესი დაასრულონ 2012 წლის მაისში. დანართში ფიქისრებული ცალკეული ეტაპების რეალიზაციის ვადები მნიშვნელოვნად ხელს უწყობს შიდა პროცედურების დროულად ჩატარებას, პროექტის შესრულებისას მხარეთა ძალისხმევების სინქრონიზაციას და მიმდინარეობის ერთობლივი მონიტორინგის გამჭვირვალე სისტემის ფორმირებას.
ქართული და თურქული მხარეების შემდეგი შეხვედრისათვის, თურქული მხარე მოამზადებს 2015 და 2017 წლებისათვის ელექტროენერგიის ნაკადის განაწილების ანალიზს და თურქეთის ენერგოსისტემის დინამიური სტაბილურობის ანალიზს (თურქეთისა და საქართველოს ენერგოსისტემების არსებულ და გეგმიურ მაკავშირებელზე ფოკუსირებით, კავშირის ადგილი თურქეთში), ასევე უნდა წარადგინოს რეკომენდაციები საქართველო-თურქეთის ენერგოსისტემების მაკავშირებლების უსაფრთოხოებისათვის და რისკის მინიმალიზაციისათვის. ხოლო ქართული და თურქული მხარეების შემდეგი შეხვედრისათვის ქართულმა მხარემ უნდა მოამზადოს საქართველოს ენერგოსისტემის დინამიური მოდელის კვლევა (საქართველოსა და თურქეთის ენერგოსისტემების არსებულ და გეგმიურ მაკავშირებელზე ფოკუსირებით, კავშირის ადგილი საქართველოში), ასევე უნდა წარადგინოს რეკომენდაციები საქართველო-თურქეთის ენერგოსისტემების მაკავშირებლების უსაფრთხოებისათვის და რისკის მინიმალიზაციისათვის.
მხარეები შეთანხმდნენ უახლოეს მომავალში ჩაატარონ შეხვედრა "თეიაშის", სსე-სა და "ენერგო პრო ჯორჯიას" მონაწილეობით 400 კვ მაღალი გადამცემი ხაზის ახალციხე-ბორჩხას ანძების დიზაინისა და დაცვის სისტემების შესახებ. ასევე შეთანხმდნენ ტექნიკური ინფორმაციით ურთიერთუზრუნველყოფის შესახებ.
მხარეების შემდეგი სამუშაო შეხვედრა გაიმართება 2011 წლის 19-20 აპრილს ქალაქ ანკარაში, ხოლო ფინალური შეხვედრა - 2011 წლის 3 მაისს, სტამბულში, რომელზეც მოხდება ერთობლივი ტექნიკური კვლევების საბოლოო შედეგების ანალიზი.