გარემოს დაცვის ინსპექციის ფუნქციების ნაწილი რეფორმირებულ გარემოს დაცვის სამინისტროში დარჩება. როგორც გარემოს დაცვისა და ბუნებრივი რესურსების მინისტრმა გოგა ხაჩიძემ, დღეს მთავრობის სხდომის დასრულების შემდეგ განაცხადა, გარემოს დაცვის ინსპეციის მრავალმხრივი ფუნქციებიდან, ნაწილი უფლებამოსილებისა რეფორმირებულ გარემოს დაცვის სამინისტროში დარჩება.
გოგა ხაჩიძის განმარტებით, გარემოს დაცვის ინსპექციის ფუნქციები, როგორიცაა ინსპექტირება და მონიტორინგი გარემოს დაცვის სამინისტროში დარჩება, ხოლო სწრაფი რეაგირება და სხვა ფუნქციები სხვადასხვა სამინისტროზე იქნება დელეგირებული.
შეგახსენებთ, რომ გარემოს დაცვის ინსპექციის გაუქმების გადაწყვეტილება გარემოს დაცვისა და ბუნებრივი რესურსების სამინისტროში რეორგანიზაციის შემდეგ მიიღეს. გარემოს დაცვის ინსპექცია საქართველოს გარემოს დაცვისა და ბუნებრივი რესურსების სამინისტროში 2005 წელს შეიქმნა. იგი გარემოს დაცვის სფეროში განხორციელებულ ყველაზე მნიშვნელოვან ღონისძიებად ითვლებოდა.
