უკრაინის საგარეო საქმეთა მინისტრმა ანდრი სიბიჰამ განაცხადა, რომ უკრაინა აშშ-სთან აქტიურად მუშაობს Patriot-ის ს რაკეტების წარმოებისთვის ლიცენზიის მისაღებად.
მისი თქმით, პრეზიდენტმა ვოლოდიმირ ზელენსკიმ დაავალა, უკრაინაში კრიტიკულად მნიშვნელოვანი შეიარაღების წარმოების მაქსიმალური ლოკალიზაცია განხორციელდეს.
„ამიტომ გავაგრძელებთ ლიცენზიების მიღების პროცესის მაქსიმალურად დაჩქარებას. ზოგიერთ პარტნიორთან ასეთი ლიცენზიები უკვე მიღებული გვაქვს და გარკვეული წარმოებაც ამოქმედებულია. ეს ძალიან მგრძნობიარე სფეროა და არასწორი იქნება იმის თქმა, კონკრეტულად რომელ წარმოებებს ეხება. ვფიქრობ, მტერი ამას ბრძოლის ველზე დაინახავს და იგრძნობს“, - განაცხადა სიბიჰამ.
მისივე თქმით, ამ ეტაპზე მთავარი ამოცანაა ანტიბალისტიკური შესაძლებლობების გაძლიერება.
„სამწუხაროდ, მსოფლიო და გეოპოლიტიკური რეალობა ისეთია, რომ ამერიკული მხარე წელიწადში დაახლოებით PAC-3 ტიპის 600 რაკეტას აწარმოებს. ახლო აღმოსავლეთში არსებული ვითარების ფონზე გვესმის, რამდენად რთულია დღეს ამ რაკეტების მიღება, შეძენა, გაცვლა ან სხვა გზით მოპოვება. ჩვენ ფაქტობრივად თითოეული რაკეტისთვის ვიბრძვით. დღეს პრეზიდენტს ამ საკითხზე კიდევ ცალკეული თათბირებიც ექნება“, - აღნიშნა მან.
სიბიჰამ დასძინა, რომ ამჟამად კიევში უკრაინის საზღვარგარეთული დიპლომატიური მისიების ხელმძღვანელთა შეხვედრა მიმდინარეობს და თითოეული ელჩი, განსაკუთრებით ანტირაკეტების მოპოვებაზე მუშაობს.
მისი თქმით, უკრაინა ამ საკითხზე ამერიკულ მხარესთანაც აქტიურად თანამშრომლობს. უკვე გაიმართა და მომავალშიც გაიმართება კონსულტაციები მწარმოებლებთან, რადგან ამ პროცესში რამდენიმე მნიშვნელოვანი მხარე მონაწილეობს.
„უკრაინის პრეზიდენტსა და აშშ-ის პრეზიდენტს შორის პრინციპული საუბრები უკვე შედგა. ახლა საჭიროა ყველა ამ საკითხის განხილვა პროცესში ჩართულ ყველა მხარესთან. ეს მოლაპარაკებები გრძელდება“, - განაცხადა სიბიჰამ.
