თურქეთმა სამშაბათს რუსეთსა და უკრაინას მოუწოდა, მიიღონ ზომები შავ ზღვაში ნაოსნობის უსაფრთხოების უზრუნველსაყოფად, მას შემდეგ, რაც ნოვოროსიისკის მახლობლად დრონით თავდასხმის შედეგად თურქეთის კუთვნილი სატვირთო გემი დაზიანდა, ხოლო ეკიპაჟის სამი წევრი მძიმედ დაშავდა.
ამის შესახებ Reuters იუწყება.
თურქეთის საგარეო საქმეთა სამინისტროს განცხადებით, ანკარა სერიოზულად არის შეშფოთებული შავ ზღვაში სამოქალაქო გემებზე თავდასხმებით, მიუხედავად იმისა, რომ „არაერთხელ გააფრთხილა“ მხარეები. უწყებაში აღნიშნეს, რომ თურქეთის მოქალაქეების მდგომარეობას ყურადღებით აკვირდებიან.
არსებული ინფორმაციით, თურქეთისკენ მიმავალი სატვირთო გემი რუსეთის შავი ზღვის სანაპიროსთან დრონის შეტევის სამიზნე გახდა. ეკიპაჟის 22-ვე წევრი ევაკუირებულია, ხოლო სამმა მათგანმა, სავარაუდოდ, მძიმე დაზიანებები მიიღო.
თურქეთის საზღვაო საქმეთა გენერალური სამმართველოს ცნობით, ეკიპაჟის წევრთა შორის 13 თურქეთის მოქალაქეა.
წინასწარი შეფასებით, დაზიანებულია გემის საცხოვრებელი ნაწილი და ცხვირი, ხოლო ბორტზე ხანძარი გაჩნდა.
.
