მოსკოვის ოლქის გუბერნატორის, ანდრეი ვორობიოვის განცხადებით, მოსკოვის ოლქში უკრაინული დრონებით განხორციელებული შეტევის შედეგად ხუთი ადამიანი დაიღუპა, ექვსი კი დაშავდა.
მისი ინფორმაციით, ყველაზე ძლიერი დარტყმა ჩეხოვის მუნიციპალურ ოლქზე განხორციელდა.
ვორობიოვის თქმით, ნოვოსელკის სამრეწველო ზონაში რამდენიმე ხანძარი გაჩნდა, მათგან ყველაზე მასშტაბური კი საწყობში იყო. თუმცა, გუბერნატორს არ დაუკონკრეტებია, რომელ საწყობს ეხებოდა საუბარი.
ამასთან, უკრაინული და რუსული Telegram-არხები წერენ, რომ შეტევის სამიზნე შესაძლოა Wildberries-ის მორიგი ლოგისტიკური ტერმინალი ყოფილიყო, თუმცა ეს ინფორმაცია ოფიციალურად დადასტურებული არ არის.
გუბერნატორის ცნობით, დაზიანებულია ასევე ელექტროსადგურის ქვესადგური და ადმინისტრაციული შენობა.
ასევე ლენინგრადის ოლქის გუბერნატორის, ალექსანდრ დროზდენკოს განცხადებით, 17 უკრაინული უპილოტო საფრენი აპარატი ჩამოაგდეს.
მისი თქმით, კრასნი ბორის სასაწყობე ზონაში დაზიანებები დაფიქსირდა, თუმცა არ დაუკონკრეტებია, რომელ საწყობს მიადგა ზიანი.
უკრაინული მონიტორინგის Telegram-არხები ვარაუდობენ, რომ შეტევის სამიზნე შესაძლოა ამ ტერიტორიაზე მდებარე Wildberries-ის მსხვილი ლოგისტიკური ტერმინალი ყოფილიყო, თუმცა ამ ინფორმაციის ოფიციალური დადასტურება ამ დროისთვის არ არსებობს.
გუბერნატორის ინფორმაციით, თავდასხმის შედეგად ერთი ადამიანი დაშავდა.
