ნატოში აშშ-ის ელჩმა მეთიუ უიტაკერმა განაცხადა, რომ უკრაინასთან და ევროპელ პარტნიორებთან Patriot-ის საჰაერო თავდაცვის სისტემებისთვის განკუთვნილი ჩამჭრელი რაკეტების ერთობლივი წარმოების შესახებ მოლაპარაკებები გრძელდება, თუმცა შესაბამისი შეთანხმების გაფორმება მიმდინარე ზამთრამდე ვერ მოესწრება.
ამის შესახებ მან Fox News-ის ეთერში განაცხადა.
უიტაკერის თქმით, ვაშინგტონი ამჟამად უკრაინასთან და ევროპელ პარტნიორებთან ერთად Patriot-ის საჰაერო თავდაცვის სისტემებისთვის ჩამჭრელი რაკეტების ერთობლივი წარმოების შესაძლებლობებს განიხილავს, რათა თავდაცვითი ინდუსტრიული ბაზა გააფართოოს.
„არსებობს ერთობლივი წარმოების შესაძლებლობები, რომელთა განხორციელებაც უკრაინელებთან და ევროპელებთან ერთად შეგვიძლია, რათა გავაფართოოთ ინდუსტრიული ბაზა და მხარი დავუჭიროთ უკრაინისა და ევროპის თავდაცვას,“ - განაცხადა მან.
ნატო-ში აშშ-ის ელჩის თქმით, ამ შეთანხმებებთან დაკავშირებით მოლაპარაკებები კვლავ მიმდინარეობს. მათ შორის, ვოლოდიმირ ზელენსკისთან თურქეთში გამართული შეხვედრების, კიევში შემდგომი მოლაპარაკებებისა და იმ კომპანიებთან კონტაქტების შემდეგ, რომლებიც საჭირო ტექნოლოგიებს ფლობენ.
ამასთან, ამერიკელმა დიპლომატმა აღნიშნა, რომ ამ ეტაპზე მთავარი პრიორიტეტია, უკრაინამ ზამთრის დადგომამდე რაც შეიძლება სწრაფად მიიღოს საჰაერო თავდაცვის საშუალებები.
„ახლა ყველაზე მნიშვნელოვანია, რაც შეიძლება სწრაფად მივაწოდოთ უკრაინას საჰაერო თავდაცვის ის საშუალებები, რომლებიც მას კიდევ ერთი ზამთრის გადასატანად სჭირდება - იქნება ეს იმ მოკავშირეებისგან, რომლებსაც ჭარბი რაოდენობით აქვთ რაკეტები, თუ ჩვენსავე საწარმოებში წარმოების გაზრდის გზით,“ - განაცხადა უიტაკერმა.
ამასთან, მან ხაზგასმით აღნიშნა, რომ Patriot-ის სისტემებისთვის ჩამჭრელი რაკეტების წარმოების შესახებ გრძელვადიანი შეთანხმების გაფორმება მიმდინარე ზამთრამდე ვერ მოესწრება.
„წარმოების შესახებ გრძელვადიანი შეთანხმება ამ ზამთრამდე არ გაფორმდება. ამიტომ ამ მიმართულებით მუშაობას გავაგრძელებთ,“ - აღნიშნა ნატოში აშშ-ის ელჩმა.
