ესპანეთის საგარეო საქმეთა მინისტრმა ხოსე მანუელ ალბარესმა განაცხადა, რომ ყველა მიგრანტი, რომლებმაც ესპანეთის ანკლავ სეუტაში უკანონოდ შეაღწიეს, საბოლოოდ მაროკოში დაბრუნდება.
ამის შესახებ Bloomberg წერს.
ალბარესის თქმით, თითქმის ყველა პირი, რომელმაც გასულ კვირას აფრიკაში მდებარე ესპანეთის ანკლავში უკანონოდ შეაღწია, უკვე დაბრუნებულია.
„ტერიტორიაზე უკანონოდ შემოსულთა აბსოლუტური უმრავლესობა უკვე დაბრუნდა მაროკოში. უკლებლივ ყველა მათგანი მაროკოში დაბრუნდება“, - განაცხადა მინისტრმა.
მან ასევე გააკრიტიკა იტალიის პოზიცია, რომელმაც ესპანეთიდან ჩასული ევროკავშირის არაწევრი ქვეყნების მოქალაქეების მიმართ სასაზღვრო კონტროლი გაამკაცრა.
„იყო სახელმწიფოები და მთავრობები, რომლებმაც მოლოდინი ვერ გაამართლეს. იტალიის მთავრობა ერთ-ერთი მათგანია“, - აღნიშნა ალბარესმა.
მანამდე ესპანეთის პრემიერ-მინისტრმა პედრო სანჩესმა განაცხადა, რომ იტალიის, საბერძნეთისა და დასავლეთ ბალკანეთის მარშრუტებით ევროკავშირში გაცილებით მეტი არალეგალური შესვლა ფიქსირდება, ვიდრე ესპანეთის გავლით. ალბარესმა ეს შეფასება გაიზიარა.
„სეუტა და მელილია არასდროს, არც ერთხელ არ ყოფილან შენგენის ზონის მთლიანობისთვის საფრთხე. თუმცა ევროპის სხვა ნაწილებში თავად ვნახე, როგორ უქმნის ასეთ საფრთხეს საზღვრების გამჭვირვალობა. ამ რისკს ჩვენ ვხედავდით და ესპანეთი ყოველთვის სოლიდარობას ავლენდა“, - განაცხადა მინისტრმა.
ამ კონტექსტში მან კვლავ ახსენა იტალია და აღნიშნა, რომ ქვეყანა ლამპედუზაზე მიმდინარე მიგრაციულ კრიზისს „ვერ უმკლავდება“.
ლამპედუზა ხმელთაშუა ზღვის კუნძულია, რომელიც ჩრდილოეთ აფრიკიდან მიმავალი მიგრანტებისთვის ევროკავშირში შესვლის ერთ-ერთი მთავარი პუნქტია.
ალბარესმა ასევე ხაზი გაუსვა, რომ ევროპამ ახლა ერთიანობა უნდა შეინარჩუნოს და არა ურთიერთდაპირისპირება.
„სწორედ ახლა მოვითხოვ და მოვუწოდებ ერთიანობისკენ - ესპანეთის პოლიტიკური ძალების ერთიანობისკენ სეუტისა და მელილიის საკითხში და ასევე ყველა ევროპელის ერთიანობისკენ ამ ორი ევროპული ქალაქის მიმართ“, - განაცხადა ესპანეთის საგარეო საქმეთა მინისტრმა.
ესპანეთის ხელისუფლების შეფასებით, ივლისის ბოლო დღეებში სეუტაში უკანონოდ ათიათასობით მიგრანტი შევიდა. 31 ივლისს მადრიდმა განაცხადა, რომ მათი უმეტესობა უკვე მაროკოში დააბრუნეს.
სეუტაში შექმნილი ვითარების გამო ევროკავშირის 22-მა წევრმა ქვეყანამ ბლოკის ხელმძღვანელობას მოუწოდა, დაუყოვნებლივი და კოორდინირებული ევროპული რეაგირება უზრუნველყოს.
კრიზისის ფონზე ირლანდიამ სამშაბათს, 4 აგვისტოს, ევროკავშირის იუსტიციისა და შინაგან საქმეთა საბჭოს საგანგებო სხდომა მოიწვია.
