აშშ-ის სახელმწიფო მდივანმა მარკო რუბიომ განაცხადა, რომ უახლოეს კვირებში გადაიდგმება ნაბიჯები უკრაინასა და რუსეთს შორის სამშვიდობო მოლაპარაკებების განახლების შესაძლებლობის შესასწავლად.
აშშ-ის სახელმწიფო მდივნის თქმით, უახლოეს პერიოდში მოსალოდნელია დიპლომატიური ძალისხმევის გააქტიურება, რომლის მიზანიც რუსეთ-უკრაინის ომის დასრულებაა.
„მომდევნო რამდენიმე კვირის განმავლობაში თქვენ იხილავთ გარკვეულ ძალისხმევას, რომელიც მიმართული იქნება იმის გარკვევისკენ, შევძლებთ თუ არა რუსეთსა და უკრაინას შორის მოლაპარაკებების განახლებას და ამ ომის დასრულებას“, - განაცხადა რუბიომ.
ამასთან, ამერიკელმა დიპლომატმა აღნიშნა, რომ ამ პროცესის წარმატება გარანტირებული არ არის.
„ჩვენ ასევე გვესმის, რომ ორივე მხარეს აქვს საკმაოდ მკაფიო „წითელი ხაზები“ და სანამ ამ „წითელ ხაზებს“ გარკვეულწილად არ დავაახლოებთ, სასურველ შედეგს ვერ მივაღწევთ“, - განაცხადა აშშ-ის სახელმწიფო მდივანმა.
