"ჰაიდელბერგცემენტი" სუფსაში ცემენტის ტერმინალს აამოქმედებს, რომელიც ექსპლუატაციაში აპრილიდან შევა. აღნიშნული ტერმინალიდან მოხდება შავი ზღვის პირა არეალში განთავსებული სამშენებლო ობიექტების ცემენტით მომარაგება.
კომპანიაში აცხადებენ, რომ აღნიშნული სტრატეგიული გადაწყვეტილება განაპირობა რეგიონში და ზოგადად საქართველოში დაწყებულმა
ინფრასტრუქტურის განვითარებისა და რეაბილიტაცის პროექტებმა, რამაც თავის მხრივ გამოიწვია მოთხოვნის ზრდა ცემენტზე.
გარდა ამისა, გადაწყვეტილება იქნა მიღებული ტერმინალის დასრულების შემდეგ იმავე ტერიტორიაზე დაიწყოს ცემენტის ქარხნის (წისქვილის) მშენებლობა, რომლის წლიური წარმადობა დაახლოებით 400 000 ტონა იქნება.
შეგახსენებთ, რომ 2006 წლიდან "ჰაიდელბერგცემენტმა" საქართველოში 350 მილიონ ლარზე მეტის ინვესტირება მოახდინა.
"ჰაიდელბერგცემენტი" არის სამშენებლო მასალების წარმოების ერთ-ერთი აღიარებული ლიდერი გლობალურ ბაზარზე და შედის ცემენტისა და ბეტონის მწარმოებელთა სამეულში მსოფლიოს მასშტაბით. კომპანიის კუთვნილ 2500 საწარმოში, რომლებიც 40 ქვეყანაში არის განთავსებული, 53 000 თანამშრომელია დასაქმებული.
