„ნაციონალური მოძრაობა“ აჩვენებს, როგორი არ უნდა იყოს პოლიტიკური პარტია ოპოზიციაში, – ამის შესახებ თბილისის მერმა, კახა კალაძემ განაცხადა.
მისივე შეფასებით, „ნაციონალური მოძრაობის“ რებრენდინგი წარმოუდგენელია და მხოლოდ პიარზე გათვლილი ნაბიჯია.
„ვინ უნდა გააკეთოს რებრენდინგი? როგორ წარმოგიდგენიათ ამ კონკრეტული დაჯგუფების რებრენდინგი, რომელიც დაკავშირებულია იმასთან, რაც ცხრა წლის განმავლობაში, 2012 წლამდე ხდებოდა საქართველოში? ყველას კარგად გვახსოვს, როგორ უსწორდებოდნენ და რა დამოკიდებულება ჰქონდათ ქართველ ხალხთან. ნახეთ, ვინ არიან ეს ადამიანები, როგორია მათი წარსული. როგორ შეიძლება შეიცვალოს, მაგალითად, მიხეილ სააკაშვილი, ეს წარმოუდგენელია. ეს არის ჩვეულებრივი ბლეფი და პიარულად შეფუთული ქმედებები, თუმცა რეალობაში ყველამ ძალიან კარგად ვიცით, რას წარმოადგენს „ნაციონალური მოძრაობა“ და რით იყო დაკავებული წლების განმავლობაში, ხელისუფლებაში ყოფნისას.
პრეტენზია როდესაც გაქვს, რომ იყო პოლიტიკაში, წარმოუდგენელია, გქონდეს ის დამოკიდებულება ხალხთან, რა დამოკიდებულებაც მათ ჰქონდათ. დღეს ისინი აჩვენებენ იმას, თუ როგორი არ უნდა იყოს პოლიტიკური პარტია, როდესაც ოპოზიციაში იმყოფება. აი, ეს არის „ნაციონალური მოძრაობა““, – განაცხადა კახა კალაძემ.
