შვედეთის დედაქალაქ სტოკჰოლმში გამართული „ევროპის ტყეების“ (Forests Europe) რიგით მე-10 მინისტერიალის ფარგლებში მონაწილე ქვეყნებმა სტოკჰოლმის მინისტერიალის დეკლარაციას მოაწერეს ხელი.
ევროპის წევრ სახელმწიფოებთან ერთად, დეკლარაციას ხელი საქართველოს გარემოს დაცვისა და სოფლის მეურნეობის სამინისტროს ტყის პოლიტიკის დეპარტამენტის უფროსმა, კარლო ამირგულაშვილმა მოაწერა.
დოკუმენტი მიზნად ისახავს ტყის მდგრადი მართვის სისტემის განვითარებას როგორც ეროვნულ, ისე საერთაშორისო დონეზე და შესაბამისი პრინციპებისა და მიდგომების პრაქტიკაში დანერგვის ხელშეწყობას. დეკლარაციაში განსაკუთრებული ყურადღება ეთმობა კლიმატის ცვლილებასთან ადაპტაციას, ტყის რესურსების დივერსიფიკაციას, ფინანსური რესურსების მობილიზებას, სატყეო განათლებისა და სექტორის პოპულარიზაციის მხარდაჭერას, საზოგადოებრივი ცნობიერების ამაღლებასა და დაინტერესებულ მხარეებთან ეფექტიან კომუნიკაციას.
„მინისტერიალში მონაწილეობა, როგორც „ევროპის ტყეების“ პროცესის ხელმომწერი მხარე ქვეყნისთვის, მნიშვნელოვანია საქართველოს ცნობადობის გაზრდის, სატყეო სექტორში მიმდინარე რეფორმის წარმოჩენისა და ტყის მდგარდი მართვის კუთხით საუკეთესო საერთაშორისო პრაქტიკის გაზიარების თვალსაზრისით. საქართველო, საერთაშორისო პარტნიორებთან თანამშრომლობით აქტიურად გააგრძელებს მუშაობას გარემოსდაცვით და სატყეო სექტორში ევროპული სტანდარტების დანერგვის მიმართულებით“, – განაცხადა კარლო ამირგულაშვილმა.
სტოკჰოლმში გამართული მე-10 მინისტერიალი სლოგანით „მდგრადი ტყეები მდგრადი საზოგადოებებისთვის“ ჩატარდა.
„ევროპის ტყეები“ ტყის მდგრადი მართვის საკითხებზე თანამშრომლობის მაღალი დონის პოლიტიკურ პლატფორმას წარმოადგენს, რომელიც 1990 წელს შეიქმნა. პროცესში ჩართულია 46 ქვეყანა და ევროკავშირის შესაბამისი ინსტიტუტები, რომლებიც ტყეების დაცვისა და მდგრადი მართვის მიმართულებით საერთო ხედვებსა და სტრატეგიებს ავითარებენ. საქართველო აღნიშნული პროცესის წევრი 2003 წელს გახდა.
