ფინანსთა სამინისტრომ მიკრო და მცირე ბიზნესით დაკავებული გადამხდელებისთვის სპეციალური სერტიფიკატების გადაცემა დაიწყო.
მიკრო ბიზნესის სტატუსის დამადასტურებელი სერტიფიკატი ნანული ჩიტიშვილს პირადად გადასცა ფინანსთა მინისტრმა კახა ბაინდურაშვილმა, რომელიც შემოსავლების სამსახურის უფროსთან გიორგი ცხაკაიასთან ერთად სახლში ესტუმრა მეწარმეს.
ნანული ჩიტიშვილი ბინაში თავად აცხობს სხვადასხვა სახის საკონდიტრო ნაწარმს და აბარებს მაღაზიებს. ახალი საგადასახადო კანონმდებლობის შესაბამისად, მისი ბიზნესიდან მიღებული შემოსავალი არ დაიბეგრება.
„მთავარია, რომ მიკრობიზნესით დაკავებული ადამიანები უსაფრთხოდ გრძნობდნენ თავს და ლეგალურად შეეძლოთ ბიზნესის წარმოება. მათ არ ექნებათ იმის შიში, რომ ვიღაც მოულოდნელად დააჯარიმებს, ასევე არ შეექმნებათ სირთულეები იმ მეწარმეებს, რომლებიც მიკრობიზნესით დაკავებული პირებისგან იბარებენ საქონელს, სხვადახვა სახის პროდუქციას და ა.შ. ეს კარგი შესაძლებლობაა ბიზნესმა იმუშაოს სუფთად და გაფართოების შემთხვევაში, ადვილად მოხდეს მისი დარეგისტრირება მცირე მეწარმედ," - განაცხადა ფინანსთა მინისტრმა კახა ბაინდურაშვილმა.
ახალი საგადასახადო კოდექსით მთავრობა მცირე და მიკრო ბიზნესს გამარტივებულ საგადასახადო რეგულაციებს სთავაზობს. ნებისმიერი ფიზიკური პირი, თუკი ის დამოუკიდებლად ეწევა ეკონომიკურ საქმიანობას, არ იყენებს დაქირავებულ პირთა შრომას და მისი ბიზნესის წლიური შემოსავალი არ აღემატება 30 ათას ლარს, განცხადებით მიმართავს საგადასახადო ორგანოს, დარეგისტრირდება და მიიღებს მიკრობიზნესის სტატუსს, მისი ბიზნესიდან მიღებული შემოსავალი არ დაიბეგრება.
ახალი საგადასახადო კოდექსით დადგინდა შეღავათები მცირე ბიზნესით დაკავებული მეწარმე ფიზიკური პირისთვისაც. მცირე ბიზნესის დამადასტურებელი სპეციალური სერტიფიკატები მათაც გადაეცემათ. თუკი მეწარმე ფიზიკური პირის ეკონომიკური საქმიანობიდან მიღებული შემოსავალი წლის განმავლობაში არ აღემატება 100 000 ლარს, კანონმდებლობით შესაძლებელია აირჩიოს დაბეგვრის ხელსაყრელი პირობები - ბიზნესის წლიური ბრუნვის 5% ან ერთობლივი შემოსავლის 60%-ის ოდენობის ხარჯების დამადასტურებელი დოკუმენტების წარდგენის შემთხვევაში, დასაბეგვრი შემოსავალი მხოლოდ 3%.
„მცირე ბიზნესის სტატუსის მქონე მეწარმე ფიზიკური პირი იხდის ბრუნვის გადასახადს 5%-ის ოდენობით იმ შემთხვევაში თუ არ სურს დოკუმენტაციის წარმოება. დოკუმენტების წარმოების შემთხვევაში კი ბრუნვის მხოლოდ 3%-ს. ამ შემთხვევაში, გადამხდელს საშუალება აქვს აწარმოოს მარტივი ბუღალტერია, არ დაიქირაოს ბუღალტერი, არ გაწიოს ზედმეტი დანახარჯები და ბიზნესი აწარმოოს ძალიან მარტივად," - განაცხადა შემოსავლების სამსახურის უფროსმა გიორგი ცხაკაიამ.
ამ დროისთვის შემოსავლების სამსახურში 3444 განაცხადია შესული, საიდანაც 2500 მიკრობიზნესის სტატუსის მიღებას ითხოვს.
აღნიშნული საგადასახადო შეღავათები ფინანსთა სამინისტროს შემოსავლების სამსახურის „ახალი კურსის" შემადგენელი ნაწილია, რომლის მიზანიც გადამხდელებისთვის სამართლიანი, მარტივი და სანდო საგადასახადო მომსახურების შეთავაზებაა.