აღნიშნულთან დაკავშირებით ცვლილება შედის "მიკრო და მცირე ბიზნესის სტატუსის მქონე პირებისთვის აკრძალული საქმიანობებისა და შემოსავლების სახების, რომლებიც დაიბეგრება ან/და, რომელზეც არ გავრცელდება საშემოსავლო გადასახადის დაბეგვრის რეჟიმები, განსაზღვრის შესახებ" საქართველოს მთავრობის 2010 წლის 29 დეკემბრის #415 დადგენილებაში.
როგორც დღეს, საფინანსო-საბიუჯეტო კომიტეტის სხდომაზე ფინანსთა მინისტრის მოადგილემ რუსუდან კემულარიამ განმარტა, წარმოდგენილი დადგენილების პროექტით აკრძალული საქმიანობების ჩამონათვალს, რომლის განხორციელების შემთხვევაში არ შეიძლება პირისთვის მიკრო ბიზნესის სტატუსის მინიჭება ემატება ვაჭრობა.
საფინანსო-საბიუჯეტო კომიტეტის ზურაბ მელიქიშვილის განმარტებით კი, იმ შემთხვევაში თუ ხორცილდება შესყიდული საქონლის გადამუშავება და მიწოდება, ასეთ შემთხვევაში ის მიკრო ბიზნესის სტატუს ინარჩუნებს, მაგრამ როდესაც პირი ყიდულობს და შემდეგ ყიდის პროდუქციას მას მცირე ბიზნესის სტატუსი ენიჭება.
აღსანიშნავია, რომ დადგენილებაში ვაჭრობის შესახებ დამატებების შეტანა მიკრო და მცირე ბიზნესის გამიჯვნას ითვალისწინებს, რომ არ მოხდეს პირისგან გადასახადის დამალვა, რადგან როგორც ცნობილია მიკრო ბიზნესი საშემოსავლო გადასახადით არ იბეგრება.
შეგახსენებთ, რომ პირს მიკრო ბიზნესის სტატუსი არ მიენიჭება თუ ის ახორციელებს ისეთ საქმიანობას, რომელსაც ლიცენზია ან ნებართვა სჭირდება, მიღებულმა შემოსავალმა წლის განმავლობაში შეიძლება 30 000 ლარს გადაჭარბოს, ასევ ამ ჩამონათვალში შედის სავალუტო ოპერაციების განხორციელება, სამედიცინო, არქიტექტორული, საადვოკატო ან სანოტარო, სააუდიტო, საკონსულტაციო (მათ შორის საგადასახადო კონსულტანტთა) საქმიანობა, სათამაშო ბიზნესი.