რუსეთის საგარეო საქმეთა სამინისტროში განაცხადეს, რომ რუსეთის არმია თანმიმდევრულად მიიტანს იერიშებს უკრაინაში გადაწყვეტილებების მიღების ცენტრებზე. უწყება უცხო ქვეყნების მოქალაქეებს კიევის დატოვებისკენ მოუწოდებს.
„შეიარაღებული ძალები იწყებენ დარტყმების განხორციელებას კიევში მდებარე უკრაინის სამხედრო-სამრეწველო კომპლექსის საწარმოებზე, მათ შორის კონკრეტულ ადგილებზე, სადაც ხდება იმ უპილოტო საფრენი აპარატების პროექტირება, წარმოება, პროგრამირება და გამოყენებისთვის მომზადება, რომლებსაც კიევის რეჟიმი ნატო-ს სპეციალისტების დახმარებით იყენებს. ეს სპეციალისტები პასუხისმგებელნი არიან კომპონენტების მიწოდებაზე, სადაზვერვო მონაცემების გადაცემასა და სამიზნეების მითითებაზე. დარტყმები განხორციელდება ასევე გადაწყვეტილებების მიღების ცენტრებზე და სამეთაურო პუნქტებზე“, – აცხადებენ რუსეთის საგარეო უწყებაში.
ასევე, რუსეთის საგარეო უწყებაში აცხადებენ, რომ ყველა ეს ობიექტი უკრაინის დედაქალაქში მდებარეობს, ამიტომ სამინისტრომ დიპლომატებსა და საერთაშორისო ორგანიზაციების წარმომადგენლებს მოუწოდა, რაც შეიძლება მალე დატოვონ ქალაქი, ხოლო ადგილობრივ მოსახლეობას, არ მიუახლოვდნენ სამხედრო და ადმინისტრაციულ ინფრასტრუქტურას.
