უკრაინის ევროკავშირში გაწევრიანების მოლაპარაკებების ყველა კლასტერი 2026 წლის ივნისამდე უნდა გაიხსნას. ამის შესახებ უკრაინის საგარეო საქმეთა მინისტრმა, ანდრი სიბიჰამ განაცხადა.
მინისტრის თქმით, ყველა კლასტერის ივნისის ბოლომდე გახსნა რეალური მიზანია.
„გამოვდივართ იქიდან, რომ კლასტერები ივნისში უნდა გაიხსნას. ორბანის მთავრობის მიერ შექმნილი მთავარი
პოლიტიკური დაბრკოლება მოხსნილია“, - განაცხადა სიბიჰამ.
მისივე განმარტებით, საუბარია ექვსივე კლასტრის სრულ გახსნაზე. სიბიჰამ ასევე განაცხადა, რომ უკრაინამ ყველა აუცილებელი პირობა უკვე შეასრულა.
„ჩვენ მიგვაჩნია, რომ სამართლიანია ევროკავშირისგან შესაბამისი შეფასების მიღება და ეს შეფასება სწორედ კლასტერების გახსნაა“, – აღნიშნა სიბიჰამ.
ანდრი სიბიჰამ დღეს უნგრელ კოლეგასთან ანიტა ორბანთან შვედეთის ქალაქ ჰელსინგბორგში პირველი შეხვედრა გამართა.
შეხვედრაზე მხარეებმა შეაჯამეს ამ კვირაში გამართული ექსპერტების დონეზე ორმხრივი კონსულტაციების პირველი რაუნდი ეროვნული უმცირესობების საკითხებზე და შეთანხმდნენ მეორე რაუნდის მომავალ კვირაში ჩატარებაზე.
ანდრი სიბიჰამ აღნიშნა, რომ მხარეები აღიარებენ ამ მიმართულებით პროგრესის მნიშვნელობას და ცდილობენ კონსტრუქციული გადაწყვეტილებების პოვნას და რეალური შედეგების მიღწევას.
მისივე თქმით, მან ხაზი გაუსვა უკრაინის ევროკავშირში გაწევრიანების კრიტიკულ მნიშვნელობას და მოლაპარაკებების კლასტერული პროცესის დროულ გახსნას.
უკრაინის მინისტრმა უნგრელ კოლეგას ასევე მიაწოდა ინფორმაცია ფრონტის ხაზზე არსებული ვითარებისა და სამშვიდობო პროცესის შესახებ.
დიპლომატები შეთანხმდნენ, რომ უკრაინასა და უნგრეთს შორის დიალოგის განახლება პოზიტიური ნაბიჯია ორივე ქვეყნისა და მთლიანად ევროპისათვის და კოორდინაციას გააგრძელებენ სხვადასხვა დონეზე.
