აშშ-ის სამხედრო დაზვერვის სააგენტოს მონაცემებით, უკრაინამ წლის დასაწყისში განხორციელებული კონტრშეტევის შედეგად დაახლოებით 400 კვადრატული კილომეტრი ტერიტორია დაიბრუნა მას შემდეგ, რაც რუსული ძალებისთვის ათასობით Starlink-ის ტერმინალი მიუწვდომელი გახდა. ამის შესახებ Bloomberg აშშ-ის სამხედრო დაზვერვის ანგარიშზე დაყრდნობით წერს.
გამოცემის ცნობით, ეს კონტრშეტევა 2023 წლის შემდეგ კიევის პირველი მნიშვნელოვანი ტერიტორიული წინსვლა გახდა. ანგარიშში აღნიშნულია, რომ რუსეთის სამხედრო შესაძლებლობები „დროებით, მაგრამ მნიშვნელოვნად“ დასუსტდა მას შემდეგ, რაც უკრაინულმა მხარემ Starlink-ის ტერმინალები მწყობრიდან გამოიყვანა.
რუსული ძალები SpaceX-ის მიერ შექმნილ Starlink-ის ტერმინალებს ჯარების გადაადგილებისა და დრონების დარტყმების კოორდინაციისთვის იყენებდნენ, განსაკუთრებით იმ რაიონებში, სადაც კავშირი არასტაბილური იყო ან ადვილად იბლოკებოდა.
ანგარიშში ასევე ნათქვამია, რომ უკრაინაში მყოფი რუსული ძალები კავშირგაბმულობის მხრივ დამატებით პრობლემებს მას შემდეგ წააწყდა, რაც კრემლმა Telegram-ზე შეზღუდვები გაამკაცრა. ამან უკმაყოფილება გამოიწვია რუს სამხედროებში, რომლებიც პლატფორმას ბრძოლის ველზე კომუნიკაციისთვის აქტიურად იყენებდნენ.
Bloomberg აღნიშნავს, რომ აშშ-ის სამხედრო დაზვერვის სააგენტოს (DIA) დასკვნა Starlink-ის შესახებ კიდევ ერთხელ უსვამს ხაზს ამ ტერმინალების მნიშვნელოვან როლს ოთხ წელზე მეტხანს მიმდინარე ომში.
მანამდე უკრაინის თავდაცვის მინისტრმა მიხაილო ფიოდოროვმა განაცხადა, რომ Starlink-ის გათიშვა და საშუალო რადიუსის დრონების გამოყენება მნიშვნელოვანი ფაქტორები გახდა, რომლებმაც ოკუპანტების წინსვლის შენელებას შეუწყო ხელი.
