ბელარუსი უკრაინასთან ომში მხოლოდ იმ შემთხვევაში ჩაერთვება, თუ ქვეყნის წინააღმდეგ აგრესია განხორციელდება. ამის შესახებ ბელარუსის პრეზიდენტმა ალექსანდრ ლუკაშენკამ განაცხადა.
მისი თქმით, თუ ბელარუსის ტერიტორიაზე თავდასხმა მოხდება, მაშინ „ბრესტიდან ვლადივოსტოკამდე“ სამშობლოს დაცვა ერთად მოუწევთ. ამასთან, ლუკაშენკამ აღნიშნა, რომ მინსკი ომში ჩართვას არ გეგმავს, რადგან ამის „არც სამოქალაქო და არც სამხედრო აუცილებლობა“ არ არსებობს.
ლუკაშენკამ ასევე განაცხადა, რომ მზად არის უკრაინის პრეზიდენტთან, ვოლოდიმირ ზელენსკისთან შეხვედრისთვის „უკრაინის ან ბელარუსის ნებისმიერ წერტილში“, რათა ორმხრივი ურთიერთობები და პერსპექტივები განიხილონ.
„თუ ზელენსკის რაიმეზე საუბარი ან კონსულტაცია სურს, მზად ვართ. რატომღაც ამერიკელებთან, გერმანელებთან, პოლონელებთან, ლიეტუველებთან და ლატვიელებთან სალაპარაკო გვაქვს, უკრაინასთან კი - არა?“ - განაცხადა მან.
მანამდე ზელენსკიმ განაცხადა, რომ რუსეთი შესაძლოა ბელარუსის ან ბრიანსკის ოლქის მიმართულებიდან კიევზე ახალი შეტევის მომზადებას ცდილობდეს. მისი თქმით, უკრაინა აძლიერებს ჩერნიჰივი-კიევის მიმართულებას და სხვადასხვა შესაძლო სცენარისთვის ემზადება, მათ შორის შორი მოქმედების დარტყმების გაფართოებისთვისაც.
