ხვალ, 18 თებერვალს, 13:00 საათზე, სოფელ ალავერდში, პრეზიდენტის რწმუნებული კახეთის რეგიონში გიორგი ღვინიაშვილი და ათასწლეულის ფონდის აღმასრულებელი დირექტორი გიორგი აბდუშელიშვილი ფონდის აგრობიზნესის პროექტის ფარგლებში დაფინანსებულ საფუტკრე მეურნეობას მოინახულებენ. საფუტკრე მეურნეობამ (ინდ. მეწარმე „გიორგი მახარაძე") ათასწლეულის ფონდის აგრობიზნესის განვითარების პროექტის ფარგლებში 49 მლნ. 995 დოლარის ოდენობის გრანტი 2009 წლის ნოემბერში მოიპოვა, რომლის ფარგლებშიც მოხდა თაფლის საწური თანამედროვე ტექნოლოგიური ხაზის შეძენა საფრანგეთიდან. მეურნეობის მფლობელის თანამონაწილეობით (63 ათასი 140 აშშ დოლარი) კი შეძენილი იქნა 150 ფუტკრის ოჯახი და მოხდა არსებული შენობა-ნაგებობების განახლება და კეთილმოწყობა.
2011 წელს, საწარმოს დაგეგმილი აქვს ფუტკრის რაოდენობის საკითარი ძალებით 200 ოჯახამდე გაზრდა და 3 ტონა თაფლის წარმოება. თაფლი „თაფლიკაცის" სახელით გაიყიდება როგორც რეგიონის, ასევე თბილისის სავაჭრო ქსელში. ამ ეტაპზე, საწარმოში დასაქმებულია 5 ადამიანი, თუმცა წარმოების ზრდასთან ერთად მოხდება მომსახურე პერსონალის რაოდენობის ზრდაც.
2007 წლიდან დღემდე, ათასწლეულის ფონდის აგრობიზნესის განვითარების პროექტის ფარგლებში სულ 280 საგრანტო პროექტი დაფინანსდა, საერთო თანხით 15.8 მილიონი აშშ დოლარი და ამდენივე ინვესტიცია იქნა მოზიდული თანადაფინანსების სახით, რითაც ათასწლეულის გამოწვევის პროგრამის ფარგლებში სოფლის მეურნეობაში ჩადებული ინვესტიციის ოდენობამ 32 მილიონ აშშ დოლარს მიაღწია. პროექტები საქართველოს ყველა რეგიონში ხორციელდება სოფლის მეურნეობის სხვადასხვა დარგებში და მიზნად ისახავს პირველადი წარმოების, მცირე და საშუალო საწარმოებისა და ფერმერთა მომსახურების ცენტრების განვითარებას მთელი ქვეყნის მასშტაბით. პროექტების განხორციელების შედეგად სოფლად 3,000-მდე ახალი სამუშაო შეიქმნა, არაპირდაპირი სარგებელი კი 109 ათას 332-მა ადამიანმა ჰპოვა.