ბათუმში სამშენებლო-სარეკონსტრუქციო სამუშაოები გრძელდება, ძველი ბათუმის მსგავსად ინფრასტრუქტურა ქალაქის ცენტრალური უბანიც მოწესრიგდება. ბათუმის მერიის ინფორმაციით, ქალაქში დაწყებული სამშენებლო თუ სარეკონსტრუქციო ბუმი ბათუმის ახალ სტილს ქმნის.
მერიაში განმარტავენ, რომ დეველოპერებისა და მშენებლების მიმართ მთავარი მოთხოვნები უცვლელი რჩება - ძველ ბათუმში შენარჩუნდება არსებული კლასიკური სტილი, განვითარებად უბნებში კი დეველოპერებთან ყოველდღიურ შეხვედრებზე არქიტექტორები უპირატესობას მსუბუქ კონსტრუქციებსა და შემინული შენობებს ანიჭებენ.
"ძველი ბათუმის მსგავსად მოწესრიგდება ქალაქის ცენტრალური უბანიც _ ბარათაშვილის, ჭავჭავაძის, გორგილაძისა და მელიქიშვილის ქუჩებს შორის არსებული ტერიტორია, რომელიც არქიტექტურული თვალსაზრისით არანაკლებ მნიშვნელოვანია"- განმარტავენ ბათუმის მერიაში.
რაც შეეხება ჭავჭავაძე-პუშკინს შორის ქუჩებს, შესაძლოა სპეციალურ სავაჭრო უბნად გარდაიქმნას, სადაც სატრანსპორტო მოძრაობა შეიზღუდება და გარევაჭრობისთვის სპეციალური, თანამედროვე ინფრასტრუქტურა შეიქმნება.