აშშ-სა და ირანს შორის მოლაპარაკებები შესაძლოა, ისლამაბადში  უკვე მომავალ კვირაში განახლდეს.

ამის შესახებ The Wall Street Journal ინფორმირებულ წყაროებზე დაყრდნობით წერს.

გამოცემის ცნობით, ორივე მხარე შუამავლების დახმარებით 14-პუნქტიან ურთიერთგაგების მემორანდუმზე მუშაობს, რომელიც ერთთვიანი ომის შეწყვეტის შესახებ მოლაპარაკებების პარამეტრებს განსაზღვრავს.

დოკუმენტის პროექტი, კერძოდ, ითვალისწინებს ირანის ბირთვული პროგრამის განხილვას, ჰორმუზის სრუტეში დაძაბულობის შემცირებას და ირანის გამდიდრებული ურანის მარაგების სხვა ქვეყნისთვის შესაძლო გადაცემას.

ამასთან, წყაროების თქმით, რამდენიმე საკვანძო საკითხი კვლავ მოუგვარებელია და შესაძლოა მოლაპარაკებების ჩაშლის მიზეზი გახდეს.

1-ელ მაისს თეთრმა სახლმა კონგრესისთვის გაგზავნილ წერილში განაცხადა, რომ ირანის წინააღმდეგ საბრძოლო მოქმედებები „დასრულებულია“, მიუხედავად იმისა, რომ აშშ-ის შეიარაღებული ძალები რეგიონში კვლავ რჩებიან.

როგორც ცნობილია, 30 აპრილს ირანმა პაკისტანელი შუამავლების მეშვეობით აშშ-ს გადასცა განახლებული წინადადებები ომის დასრულების შესახებ შეთანხმებისთვის.

დონალდ ტრამპმა განაცხადა, რომ ის უკმაყოფილოა ირანის სამშვიდობო წინადადებებით, ხოლო მისი წარმომადგენლები შეთანხმების მიღწევის მიზნით მოლაპარაკებებს სატელეფონო ფორმატში აგრძელებენ.