სახელმწიფო მინისტრის თანამდებობის შემოღებას საქართველოს უსაფრთხოების საკითხების გადაჭერასთან არანაირი კავშირი არ აქვს, ეს არაფორმალური მმართველობის მორიგი გამოვლინებაა, – ამის შესახებ პარტიის „გახარია საქართველოსთვის“ წევრმა, გიორგი შარაშიძემ განაცხადა.
„მამუკა მდინარაძეს ვურჩევდი, ამ კაბინეტზეც ნუ იქნება ჩაციკლული, სახლიდან დისტანციურად იმუშაოს, თუ კოორდინაცია ასეთი მნიშვნელოვანია. კოორდინაციისთვის სუს-ის ხელმძღვანელს ექვს თვეში არ ხსნიან. სახელმწიფო უსაფრთხოების სამსახურის უფროსი ექვსი წლის ვადით შემთხვევით არ ინიშნება. კანონში ეს ჩანაწერი შემთხვევით არ არის. ვხედავთ, ბოლო ერთ წელიწადში უკვე სუს-ის ორი უფროსი შეიცვალა. ეს არასტაბილურ გარემოსა და არაფორმალურ მმართველობაზე მიუთითებს. ადამიანს, ერთ დღეში, დილით გენერლობა მიანიჭეს და საღამოს კოორდინატორად დააქვეითეს. ამ ადამიანისგან რა განსაკუთრებული მოლოდინები უნდა შევქმნათ? რაც შეეხება კოორდინატორობას, ეს ტერმინი თავად „ოცნებამ“ შემოიტანა. გუშინ გიგა ფარულავამ იურიდიული კომიტეტის სხდომაზე თქვა, მამუკა მდინარაძეს კოორდინატორად ნიშნავთო, რასაც უმრაველსობის გაღიზიანება მოჰყვა, მას ლექსიკა და ტონი დაუწუნეს. ეს კოორდინატორი „ოცნების“ მიერ შემოღებული ტერმინია და მათთვის ეს თუ შეურაცხმყოფელია, მაშინ თავად ახსნან, ეს ტერმინი საიდან მოიტანეს. როდესაც ვამბობთ, რომ გენერალ-კოორდინატორის დანიშვნა არაფერს არ შეცვლის, გარდა იმისა, რომ ეს იქნება რაღაცა მისი დაკმაყოფილება დროებით და პენსიაზე გაშვება, ეს რეალობაა“, – განაცხადა გიორგი შარაშიძემ.
