აშშ-ის სენატმა, სადაც უმრავლესობას რესპუბლიკური პარტია ფლობს, უარყო დემოკრატების კიდევ ერთი მცდელობა, შეეჩერებინათ ირანში დაწყებული ომი.
ამის შესახებ Associated Press იუწყება.
სენატორებმა უარყვეს რეზოლუცია, რომელიც დაავალდებულებდა ამერიკის შეერთებულ შტატებს გაეყვანა ჯარები კონფლიქტის ზონიდან მანამდე, ვიდრე კონგრესი არ მისცემდა ნებართვას შემდგომ სამხედრო მოქმედებებზე.
წელს უკვე მეოთხე შემთხვევაა, როდესაც აშშ-ის სენატმა პრეზიდენტს გადასცა ომის წარმოების უფლებამოსილება კონფლიქტში, რომელსაც დემოკრატები არალეგალურად და დაუსაბუთებლად მიიჩნევენ.
რესპუბლიკელები აცხადებენ, რომ ომის პირობებში ენდობიან პრეზიდენტ დონალდ ტრამპის ლიდერობას. ისინი მიუთითებენ ირანის ბირთვულ პოტენციალზე, მოლაპარაკებების გაგრძელების შესაძლებლობაზე და იმ მაღალ რისკებზე, რაც ჯარების გაყვანას შეიძლება მოჰყვეს.
ამასთან, რესპუბლიკელი კანონმდებლები ცდილობენ, კონფლიქტი რაც შეიძლება სწრაფად დასრულდეს. ზოგიერთი მათგანი უკვე ამახვილებს ყურადღებას მომავალ კენჭისყრებზე, რომლებიც შესაძლოა მნიშვნელოვანი გამოცდა გახდეს პრეზიდენტისთვის, თუ ომი გაჭიანურდება.
გარდა ამისა, ომის წარმოების უფლებამოსილების საკითხზე კენჭისყრის შედეგი აშშ-ის წარმომადგენელთა პალატაში, რომელიც ამ კვირაში უნდა გაიმართოს, ჯერ კიდევ გაურკვეველია.
Associated Press აღნიშნავს, რომ 1973 წლის „ომის უფლებამოსილებების შესახებ კანონის“ მიხედვით, კონგრესმა ომი უნდა გამოაცხადოს ან ძალის გამოყენება უნდა დაასანქციროს მისი დაწყებიდან 60 დღის განმავლობაში — ეს ვადა ამ თვის ბოლოს იწურება.
კანონი ასევე ითვალისწინებს ამ ვადის 30 დღით შესაძლო გაგრძელებას, თუმცა კანონმდებლებმა მკაფიოდ განაცხადეს, რომ სურთ პრეზიდენტ დონალდ ტრამპის ადმინისტრაციამ უახლოეს პერიოდში წარმოადგინოს კონფლიქტის დასრულების გეგმა.
