გაერთიანებული სამეფოს თავდაცვის მინისტრმა, ჯონ ჰილიმ განაცხადა, რომ ბრიტანეთმა შეიარაღებული ძალები გაგზავნა, რათა არ დაუშვას საკუთარ კაბელებსა და მილსადენებზე რუსული წყალქვეშა ნავების მხრიდან თავდასხმა.
როგორც ცნობილია გახდა, რუსეთმა ბოლო რამდენიმე თვე ბრიტანულ წყლებში კრიტიკული მნიშვნელობის წყალქვეშა ინფრასტრუქტურის მონიტორინგსა და შესწავლას დაუთმო.
ჰილის თქმით, სამეფო საზღვაო ძალების სამხედრო ხომალდი და საპატრულო ვერტმფრენი სამი რუსული წყალქვეშა ნავის „მავნე ქმედებას უთვალთვალებდა“, რის შედეგადაც რუსულმა წყალქვეშა ნავებმა მისია შეწყვიტეს.
„მინდა პრეზიდენტ პუტინს ვუთხრა: ჩვენ გხედავთ და ვაკვირდებით თქვენს ქმედებებს ჩვენი კაბელებისა და მილსადენების თავზე. უნდა იცოდეთ, რომ მათი დაზიანების ნებისმიერი მცდელობის მიმართ ტოლერანტულები არ ვიქნებით და ამას სერიოზული უარყოფითი შედეგები მოჰყვება'," - განაცხადა ჰილიმ.
ჰილის განცხადებით, მილსადენების ან კაბელების დაზიანების მტკიცებულება არ არსებობს, თუმცა დიდი ბრიტანეთი მოკავშირეებთან ერთად წყალქვეშა ინფრასტრუქტურას შეამოწმებს.
როგორც ჰილიმ აღნიშნა, რუსული ოპერაცია მოიცავდა "აკულას" კლასის მოიერიშე წყალქვეშა ნავსა და ასევე მოსკოვის ღრმა წყლების კვლევის სამმართველოს (GUGI) ორ სპეციალურ წყალქვეშა ნავს.
მისი თქმით, არ დააკონკრეტებს, თუ სად განხორციელდა ოპერაცია ან რა ინფრასტრუქტურას ემუქრებოდა რუსული წყალქვეშა ნავი, თუმცა, მან დასძინა, რომ ოპერაცია დიდი ბრიტანეთის ტერიტორიულ წყლებში არ მომხდარა.
თავდაცვის ხარჯების გაზრდის საჭიროების მიუხედავად, მან თქვა, რომ ოპერაციამ აჩვენა, რომ დიდი ბრიტანეთი რუსეთის შეკავების უნარის მქონეა.
„ვფიქრობ, დღეს ჩემს მიერ წამოწყებული ოპერაციის ხასიათი აჩვენებს, რომ ჩვენ გვყავს დიდი ბრიტანეთის შეიარაღებული ძალები, რომლებსაც შეუძლიათ აღმოაჩინონ, შეკავება, საჭიროების შემთხვევაში რეაგირება, რათა დაიცვან დიდი ბრიტანეთი, ჩვენი სასიცოცხლოდ მნიშვნელოვანი წყალქვეშა ინფრასტრუქტურა“, - თქვა მან.
