ჩვენ გულწრფელად ვცდილობთ, რომ აფხაზეთი თანამედროვე, კომფორტულ ქვეყნად ვაქციოთ საცხოვრებლად და სამუშაოდ, - ამის შესახებ რუსეთის პრეზიდენტის ადმინისტრაციის უფროსის პირველმა მოადგილემ, სერგეი კირიენკომ ოკუპირებულ აფხაზეთში მიმდინარე ეკონომიკურ ფორუმზე განაცხადა, სადაც მან მონაწილეებს პრეზიდენტ ვლადიმერ პუტინის მიმართვა წაუკითხა.
"ჩვენ არა მხოლოდ ვეხმარებით ერთმანეთს, როგორც კარგი მეზობლები, არამედ ურთიერთსასარგებლო თანამშრომლობა და ინტეგრაციული კავშირები ახალ დონეზე ავიყვანოთ.
ჩვენ გულწრფელად ვცდილობთ, რომ აფხაზეთი თანამედროვე, კომფორტულ ქვეყნად ვაქციოთ საცხოვრებლად და სამუშაოდ.
დარწმუნებული ვარ, რომ გვაქვს ყველა შესაძლებლობა, მნიშვნელოვნად გავაფართოოთ თანამშრომლობის პოტენციალი და შევავსოთ იგი ამბიციური იდეებითა და ინიციატივებით. გისურვებთ წარმატებებს და ყოველივე საუკეთესოს!“ - ნათქვამია პუტინის გზავნილში.
ცნობისთვის, სოხუმში ეკონომიკური ფორუმი „აფხაზეთი: ინვესტიციები მომავალში“ გაიხსნა. ღონისძიებაზე დასასწრებად დელეგაციები ჩავიდნენ ოკუპირებული ცხინვალიდან და მოსკოვიდან. მათ შორის ოკუპირებული ცხინვალის რეგიონის ე.წ. პრეზიდენტი ალან გაგლოევი და რუსეთის პრეზიდენტის ადმინისტრაციის უფროსის პირველი მოადგილე სერგეი კირიენკო. ოკუპირებული აფხაზეთის ე.წ. ლიდერმა ბადრა გუნბამ განაცხადა, რომ ფორუმის ფარგლებში „სამი სამთავრობათშორისო შეთანხმების, ერთი უწყებათშორისი შეთანხმების, 15 სამთავრობათშორისო და უწყებათშორისი მემორანდუმის და 19 საწარმოებს შორის შეთანხმების“ ხელმოწერა იგეგმება.
