დღეს, 16 თებერვალს, 10:00 საათზე, ტურიზმის საინფორმაციო ცენტრში საქართველოში ოფიციალური ვიზიტით მყოფი, მოლდოვის რესპუბლიკის ტურიზმის სახელმწიფო სააგენტოს დირექტორი ლუდმილა დემეტრაში შეხვდება თავის კოლეგას, ტურიზმის ეროვნული სააგენტოს თავმჯდომარეს, მაია სიდამონიძეს, სადაც განიხილავენ ორ ქვეყანას შორის ტურიზმის სფეროში თანამშრომლობის საკითხებს. განიხილება თანამშრომლობის გააქტიურება "სუამის" ფარგლებში, ერთიანი ტურისტული პროდუქტის შექმნისა და საერთაშორისო ბაზარზე გატანის მიზნით.
შეხვედრაზე მაია სიდამონიძე და ლუდმილა დემეტრაში განიხილავენ თანამშრომლობის მემორანდუმის საკითხებს, რომლის გაფორმებაც აპრილში, მოლდოვის ტურიზმის გამოფენის ფარგლებში იგეგმება. შეხვედრის დამთავრებისთანავე დემეტრაში გაემგზავრება კახეთში, მოინახულებს უძველეს ღვინის მარნებს, გაეცნობა ქართული ღვინის კულტურასა და ტრადიციებს.
ვიზიტის ფარგლებში დემეტრაში აჭარის მთავრობის თავმჯდომარეს ლევან ვაშალომიძეს შეხვდა, დაათვალიერეს ბათუმში მიმდინარე ინფრასტრუქტურული ცვლილებები და გაეცნენ აჭარის ტურისტულ პოტენციალს.
