რუსეთმა შეერთებული შტატებისგან უკრაინასთან სამშვიდობო მოლაპარაკების შესახებ არაერთი „საინტერესო“ წინადადება მიიღო, თუმცა ეს წინადადებები ჯერ არ განხორციელებულა.
ამის შესახებ რუსეთის პრეზიდენტის თანაშემწემ იური უშაკოვმა რუსულ მედიასთან ინტერვიუში განაცხადა.
რუსმა ჟურნალისტმა უშაკოვს ჰკითხა თუ რატომ არ შეუძლია აშშ-ს „მოითხოვოს კიევისგან“ იმის შესრულება, რაზეც დონალდ ტრამპი და ვლადიმირ პუტინი უკრაინის ზურგს უკან შეთანხმდნენ ანკორიჯში აგვისტოში გამართულ შეხვედრაზე.
„იცით, შეიძლება საიდუმლოს ვამხელ, მაგრამ ზუსტად ამისკენ მოვუწოდებთ ჩვენს ამერიკელ კოლეგებს. ახლა ეს არის საჭირო. ვფიქრობ, რომ ამერიკელებს ძალიან კარგად შეუძლიათ კიევზე ზეწოლა და მასზე გავლენის მოხდენა“, - უპასუხა უშაკოვმა.
პუტინის თანაშემწემ აღნიშნა, რომ მიუხედავად ამისა, „ამერიკელები, ჩაერთნენ ომის დასრულების საკითხში და გამოთქვეს არაერთი საკმაოდ საინტერესო და სასარგებლო მოსაზრება და წინადადება. მაგრამ ჯერჯერობით ის არ განხორციელებულა“, - თქვა მან.
