უკრაინის პრეზიდენტმა ვოლოდიმირ ზელენსკიმ განაცხადა, რომ უკრაინისა და საუდის არაბეთის თავდაცვის სამინისტროებს შორის თავდაცვის სფეროში თანამშრომლობის შესახებ მნიშვნელოვანი შეთანხმება გაფორმდა.
„საუდის არაბეთის მემკვიდრე პრინცთან, მოჰამედ ბინ სალმან ალ საუდთან ჩვენი შეხვედრის დაწყებამდე ხელი მოეწერა შესაბამის დოკუმენტს.
ეს საფუძველს უყრის შემდგომ კონტრაქტებს, ტექნოლოგიურ თანამშრომლობასა და ინვესტიციებს და აძლიერებს უკრაინის საერთაშორისო როლს, როგორც უსაფრთხოების დონორის“, - განაცხადა ზელენსკიმ
მან აღნიშნა, რომ უკრაინა მზადაა, საუდის არაბეთს გაუზიაროს თავისი გამოცდილება და ითანამშრომლოს სიცოცხლის დაცვის გასაძლიერებლად.
„უკვე ხუთი წელია, უკრაინელები ებრძვიან იმავე ტერორისტულ თავდასხმებს ბალისტიკური რაკეტებითა და დრონებით, რომლებსაც ირანის რეჟიმი ახლა ახლო აღმოსავლეთსა და სპარსეთის ყურის რეგიონში ახორციელებს. და საუდის არაბეთს აქვს რაღაც, რითაც უკრაინა დაინტერესებულია. ეს თანამშრომლობა შეიძლება ორმხრივად სასარგებლო იყოს“, - ხაზი გაუსვა ზელენსკიმ.
უკრაინის პრეზიდენტმა დასძინა, რომ მათ ასევე განიხილეს ახლო აღმოსავლეთსა და მთლიანად სპარსეთის ყურის რეგიონში არსებული ვითარება, რუსეთის მიერ ირანის რეჟიმისთვის დახმარება, საწვავის ბაზრებზე არსებული ვითარება და ენერგეტიკის სფეროში შესაძლო თანამშრომლობა.
