"ბოლომდე გაწელავენ [პროცესს] და მერე ივანიშვილი, რუსები, როცა გადაწყვეტენ, მერე [ჩაგვსვამენ]" - ამის შესახებ კოალიცია "ცვლილებისთვის" ერთ-ერთმა ლიდერმა, ზურაბ გირჩი ჯაფარიძემ სასამართლო პროცესის შემდეგ განაცხადა.
მისი თქმით, სასამართლო პროცესის დახურულ რეჟიმში წარმართვის ერთადერთი მიზეზი ისაა, რომ "ქართულ ოცნებას" არ უნდა საზოგდაოებამ მოისმინოს "საგიჟეთი, რაც შიგნით ხდება".
"ჩემი აზრით, [პროცესის დახურვის] ერთადერთი მიზეზია, რომ არ უნდათ საზოგადოებამ მოისმინოს საგიჟეთი, რაც შიგნით ხდება, თუნდაც დღეს რაც იყო, პროკურორების სიტყვა.
მთავარი მიზანი ცხადია არის ის, რომ დასავლეთს გაუგზავნონ სიგნალი, რომ აქ არანაირი დემოკრატიის ნიშანწყალი არ არსებობს და ხომ გასაგებია რამდენიც არ უნდა ილაპარაკოს იმან, რომ ეს ქვეყანა უნდა დაუბრუნდეს ევროინტეგრაციის გზას, ვერანაირი ევროინტეგრაციის გზას, თავისუფალ სამყაროსთან ინტეგრაციის გზას ეს ქვეყანა ვერ დაუბრუნდება, სანამ ლიდერები ციხეში სხედან და ვინც გარეთ არის ყველა სასამართლო პროცესშია და ელოდება ზოგი 3, ზოგი 4 და 15 წელს ციხეს. ერთი მთავარი მიზანი არის ის, რომ ბოლომდე ჩაჭრან ის ძაფები, რომელიც ჯერ კიდევ არსებობს დასავლეთთან დამაკავშირებელი.
მეორე მიზანი არის ის, რომ დროში გაწელავენ და ივანიშვილი როცა გადაწყვეტს და რუსები როცა გადაწყვეტენ, მერე მიიღებენ მაგ გადაწყვეტილებას, ახლა, ჩემი აზრით, არ აქვთ გადაწყვეტილი ჩაგვსვამენ თუ არ ჩაგვსვამენ," - განაცხადა ზურაბ გირჩი ჯაფარიძემ.
ცნობისთვის, თბილისის საქალაქო სასამართლოში ე.წ. საბოტაჟის საქმეზე მიხეილ სააკაშვილის, ნიკა მელიას, ნიკა გვარამიას, ზურაბ გირჩი ჯაფარიძის, გიორგი ვაშაძის, ბადრი ჯაფარიძის, მამუკა ხაზარაძისა და ელენე ხოშტარიას საქმის განხილვა დახურულ რეჟიმში მიმდინარეობდა.
დღევანდელ პროცესზე მხარეები შესავალ სიტყვებს წარმოთქვავდნენ.
