არსებობს სიგნალები უკრაინასა და რუსეთს შორის ტყვეების გაცვლის შესაძლო გაგრძელებაზე, - ამის შესახებ უკრაინის პრეზიდენტმა, ვოლოდიმირ ზელენსკიმ აშშ-ში გამართული მოლაპარაკებების მეორე დღის დასრულების შემდეგ განაცხადა.
ზელენსკის თქმით, უკრაინის მომლაპარაკებელთა გუნდის დაბრუნების შემდეგ დეტალურად განიხილავენ შეხვედრების ყველა ასპექტს, რადგან ზოგიერთი საკითხის ტელეფონით უსაფრთხოდ განხილვა შეუძლებელია.
„ველოდები, რომ ჩვენი მომლაპარაკებელთა ჯგუფის უკრაინაში დაბრუნების შემდეგ, ჩვენ დეტალურად განვიხილავთ შეხვედრების ყველა იმ ასპექტს, რომელთა უსაფრთხოდ განხილვა ამჟამად ტელეფონით შეუძლებელია.
არსებობს ნიშნები, რომ შესაძლებელია ტყვეთა გაცვლის გაგრძელება და ეს ნამდვილად კარგი ამბავი და დადასტურება იქნებოდა იმისა, რომ დიპლომატია მუშაობს. ვიმედოვნებთ, რომ ეს გამოვა", - აღნიშნა ზელენსკიმ.
როგორც ზელენსკიმ აღნიშნა, მოისმინა მოხსენება ფლორიდაში გამართული ორდღიანი მოლაპარაკებების შესახებ. მისივე თქმით, მიუხედავად იმისა, რომ აშშ-ის მთავარი ყურადღება ამ პერიოდში ირანის გარშემო არსებულ ვითარებაზეა გადატანილი, უკრაინაში მიმდინარე ომის დასრულებაც აუცილებელია.
„ნათელია, რომ ამ დროისთვის ამერიკული მხარის მთავარი ყურადღება ირანისა და რეგიონის გარშემო არსებულ ვითარებაზეა ორიენტირებული, თუმცა რუსეთსა და უკრაინას შორის ეს ომიც უნდა დასრულდეს. ამას მსოფლიოში ყველა ერთნაირად აღიქვამს და მე ძალიან მადლიერი ვარ ამერიკული საზოგადოების უკრაინისთვის ნორმალური, ღირსეული მშვიდობისადმი მათი მკაფიო მხარდაჭერისთვის“, - განაცხადა ზელენსკიმ.
ამასთან, უკრაინის პრეზიდენტმა კიდევ ერთხელ გაუსვა ხაზი, რომ აგრესორმა არ უნდა მიიღოს „ჯილდო“ ომისთვის და უსაფრთხოების გარანტიები საკმარისად ძლიერი უნდა იყოს, რათა მომავალში ომის განმეორება არ მოხდეს.
ზელენსკის თქმით, საერთო ჯამში „სიტუაცია საკმაოდ გამჭვირვალეა“ და „პუტინს არ სურს ომის დასრულება“.
„მთავარია ის, რა სურს მსოფლიოს. ჩვენ ყველამ ერთად ყველაფერი უნდა გავაკეთოთ და ჩვენ გავაგრძელებთ ყველაფრის გაკეთებას, რათა ეს ომი დასრულდეს“, – განაცხადა ზელენსკიმ.
