Politico-ს ცნობით, რუსეთმა აშშ-ს შესთავაზა შეთანხმება, რომლის მიხედვითაც კრემლი ირანს სადაზვერვო ცნობებს არ გაუზიარებდა, თუ ვაშინგტონი შეწყვეტდა უკრაინისთვის სადაზვერვო მონაცემების მიწოდებას.
ორი წყაროს ცნობით, რუსეთის წარმომადგენელმა კირილ დმიტრიევმა ეს წინადადება აშშ-ის ადმინისტრაციის წარმომადგენლებს, სტივ უიტკოფს და ჯარედ კუშნერს, გასულ კვირას მაიამიში გამართულ შეხვედრაზე გადასცა.
მათი თქმით, შეერთებულმა შტატებმა უარყო რუსეთის წინადადება.
თუმცა, როგორც Politico აღნიშნავს, ფაქტმა ევროპელ დიპლომატებში შეშფოთება გამოიწვია, რომლებიც შიშობენ, რომ მოსკოვი ტრანსატლანტიკური ურთიერთობებისთვის კრიტიკულ მომენტში ევროპასა და შეერთებულ შტატებს შორის განხეთქილების შეტანას ცდილობს.
კიდევ ერთი წყაროს ცნობით, რუსეთმა აშშ-ს ირანთან დაკავშირებით სხვა წინადადებებიც წარუდგინა, თუმცა ყველა მათგანი უარყოფილი იქნა.
მისი თქმით, შეერთებულმა შტატებმა, კერძოდ, უარყო ირანის გამდიდრებული ურანის რუსეთში გადატანის წინადადება, რომლის შესახებაც ადრე Axios-მა გაავრცელა ინფორმაცია.
როგორც მედია აღნიშნავს, დაზვერვის გაზიარება კვლავ რჩება ამერიკული მხარდაჭერის ბოლო მთავარ საყრდენად უკრაინისთვის მას შემდეგ, რაც ტრამპის ადმინისტრაციამ გასულ წელს შეწყვიტა ფინანსური და სამხედრო დახმარების უმეტესი ნაწილი.
