მთავრობა ქმნის ახალ საინვესტიციო ფონდს, საიდანაც სხვადასხვა მსხვილი საინვესტიციო პროექტები დაფინანსდება.
როგორც პრემიერ-მინისტრმა მთავრობის სხდომაზე აღნიშნა, აღნიშნული ფონდიდან დაფინანსდება ნავთობგადამამუშავებელი ქარხნის მშენებლობა, რომელზედაც საქართველო აზერბაიჯანთან მოლაპარაკებას უკვე აწარმოებს.
"პრეზიდენტმა თავის გამოსვლაში აღნიშნა, რომ სახელმწიფო კერძო სექტორთან კოორდინაციაში და მჭიდრო კავშირში შეეცდება რამდენიმე მსხვილი საინვესტიციო პროექტი განახორციელოს. ვგულისხმობ ნავთობგადამამუშავებელის მშენებლობას. პროექტის განხორციელებაზე კონსულტაციები გვაქვს აზერბაიჯანელ კოლეგებთან. გარდა ამისა, იგეგმება სოფლის მეურნეობის განვითარებისთვის ლოჯისტიკური ცენტრების შექმნა. კიდევ რამდენიმე მსხვილი პროექტია, რომელიც ქვეყნის ეკონომიკური განვითარებისთვის მნიშვნელოვანია", - განაცხადა ნიკა გილაურმა.
პრემიერ-მინისტრი ამბობს, რომ დღეს კერძო სექტორს მსხვილი საინვესტიციო პროექტების განხორციელება დამოუკიდებლად უჭირს და ამ კონტექსტში სახელმწიფოს მხრიდან დახმარება უფრო მეტი შედეგის მომტანი იქნება.
"კერძო სექტორისთვის ძალიან მძიმეა ასეთ ფონდზე მუშაობა. სახელმწიფო ინდივიდუალურად შეეცდება თანხის მოძიებას. ჩვენ ჩამოაყალიბებთ ახალ ფონდს და ეს იქნება პრინციპში პარტნიორული ფონდი, საიდანაც სხვდასახვა პროექტები განხორციელდება. მათ შორის პირველია სოფლის მეურნეობისთვის ლოგისტიკური ცენტრები, მეორე ენერგოუსაფრთხოება და მესამე ეს იქნება ისეთი პროექტები, რომელსაც კერძო სექტორი ინდივიდუალურად ვერ განახორციელებს", - განაცხადა პრემიერ მინისტრმა.
ნიკა გილუარი აცხადებს, რომ ახალი ფონდის შესაქმნელად საკანონმდებლო ინიციატივაც გახდება საჭირო. კანონპროექტი კი მთავრობას უახლოეს დღეებში ექნება მზად, რომლის განხილვაშიც საზოგადოება ჩაერთვება.
